Musobaqada vakillarimiz chorak finalgacha etib bordi va mundial yo'llanmasi uchun kechgan uchrashuvda Koreya Respublikasiga penaltilar seriyasida mag'lub bo'ldi. Bugun O'FA majlislar zalida terma jamoa bosh murabbiyi Farhod Nishonov, yordamchilar Pavel Zaxarov, Ruslan Matniyozov, Ayder Kurbaev, Rauf Inileev ishtirokida matbuot anjumani bo'lib o'tdi. Unda OAV o'zlarini qiziqtirgan savollarga javob oldi.

"Har bir terma jamoa muxlislarniki, davlatniki. Shu bois musobaqadan keyin terma jamoa aslida qanday yo'lni bosib o'tgani, qanday qiyinchiliklar ko'rgani, aslida nimalar bo'lganini tushuntirishga qaror qildik. Aayrim qo'shtirnoq ichidagi insonlar, har xil gap so'zlar bilan ishimizni bo'rttirib, shubhali gaplar bilan ovoza qilishmoqda. Biz shu paytgacha hech qanday shubhali ish qilmaganmiz. Maqsadimizni bilardik. Har qiladigan ishimizda vatan uchun xizmat qilganmiz. Har bir bir o'yinga jiddiy qaraganmiz. Murabbiylar shtabi o'ziga berilgan vazifani imkoniyat darajasida bajardi. Murabbiyning ishi shundayki, qachon va qaerda ishlashingizni, haydalishingizni bilmaysiz. Natijaga murabbiy javob beradi, bundan tushkunlikka tushmaymiz. Lekin futbolchilarni qo'llab-quvvatlashimiz kerak. Fikrimcha, bizga omad etishmadi. Penaltilar seriyasida manaman degan futbolchilar ham gol ura olmagan. Kimdir buni ruhiy holat bilan bog'laydi. Kimdir bosimni ko'tara olmasligini aytadi. Bu omadga bog'liq. Gol ura olmagan futbolchilar o'z ustida ishlagan, yaxshi tayyorgarlik ko'rgan. Penaltilar bo'yicha shug'ullanib kelgan. Bizda shubha qoldirishmagan",- deydi Farhod Nishonov.

- Terma jamoamiz bu musobaqagacha ko'plab uchrashuvlarda maydonga tushdi. Lekin raqiblar aynan kerakli pallada yig'in o'tkazgan, saralashlarda qatnashgan. Biz esa natija keladigan jarayonda charchab qoldik. Futbolchi klubida emas terma jamoada vaqtini o'tkazmoqda. Yangi mavsum start olyapti, lekin endi terma jamoadagi futbolchilar yarim yil zaxirada o'tirishga majbur, chunki klubida u tayyorgarlik qilmadi. Futbolchi terma jamoaga klubidan tayyor bo'lib kelishi kerak...

- Janubiy Koreyaga tushishimiz mumkinligini quradan keyin bilgandik. Biz 20 ta o'yin o'tkazganmiz. Lekin raqiblarni o'rganishimiz jarayonida ular ham shuncha uchrashuvda maydonga tushganini ko'rdik. Norasmiy o'yinlar o'tkazgan paytlari ham bo'lgan. Bitta vaqtning o'zida Koreya Respublikasi 2 ta joyda o'ynamoqda. Ularda 2-3 ta tarkib bor degani. Klublar 15 yanvardan yig'inga kirishmoqda. Fevral oyida Osiyo chempionati bor. Siz nima qilgan bo'lardingiz? Klub bolasini martdagi chempionatga tayyorlaydi. Unda boshqacha rejalar bo'ladi. Yuklamalar ko'p beriladi. Shuning hisobiga biz yig'inni erta boshlaganmiz. Etibor bergan bo'lsangiz yig'inlarni 10 kundan qildik.

- Chempionat 30 noyabr sanasida tugadi. "Paxtakor" uchun 3 dekabr. Futbolchilar dam olgani yo'q...

- Biz 10 dekabr kuni futbolchilarni yig'moqdamiz. Ungacha ular dam olyapti, hammasi reja bo'yicha ketayotgandi. Agarda penaltilar seriyasida yutganimizda savolingiz boshqacha bo'lardi.

- Koreya Respublikasiga ekstra-taymlarda jismoniy holatimiz tufayli qarshilik ko'rsata olmadikmi?

- Jismoniy holatimizni qisqa vaqt ichida yaxshi darajaga keltira oldik. O'tgan safargi anjumanda futbolchilarning jismoniy holati Saudiya Arabistoni bilan o'yinda qizil chiziqqa tushib qolganini aytishgandi. Birinchidan qizil chiziq jismoniy holati yomon degani emas. Har xil toifalari bor. Bu statistikani tarqatgan futbolchilarimiz iqtidorli lekin jamoadan chetlatilgan. Muammo futbolchilarning jarohati bilan bo'ldi. Mazkur vaziyat bizni juda qiynadi. Muhammadali O'rinboev, Abdug'afur Haydarov, G'iyos Rizaqulov, Ravshan Xayrullaev, Nurlan Ibraimov, Ro'zimboy Fayzullaev, darvozabonimiz Samandar Muratbaev aynan o'sha o'yinlardan oldin jarohat olishgan. Kimlardir klubidagi eski jarohati bilan kelgan. Shu bois optimal tarkib va o'yin ko'rsata olganimiz yo'q.

- Muhammadali O'rinboevning jarohatida saralashdan so'ng jarrohlik amaliyoti o'tkazish mumkinmidi yoki futbolchini Osiyo chempionati uchun ushlab turildimi?

- Bu yoshda rentgen qog'ozlari turlicha ko'rsatishi mumkin. Uning chuqur tekshiruv natijasini Qatardagi eng kuchli klinikada ko'rsatganimizda jarrohlik amaliyoti kerak emasligini, lekin vaqtga individual ishlashga aytishdi. Biz individual ishladik. Shifokor alohida ishladi, orada Turkiyada davolanib keldi. Oxirgi o'yinlarga kelib umumiy guruhga qo'shildi.

- Yuqorida aytganingizdek OAVdagi aynan qaysi narsa ranjitdi?

- Men ishonch bilan aytamanki, hech qanday korrupciya aralashtirmadik. Tepadan bosim bo'lmadi. Rahbariyat bizni qo'llab-quvvatladi. Bu yoshda kimdir erta, yana kimdir kech o'zini ko'rsatadi. Masalan Nurlan Ibraimov, Ro'zimboy Fayzullaev, G'iyos Rizaqulov, Samandar Muratbaevlar jarohat sabab o'zini ko'rsata olmadi. "Nasaf"da Sardor Bahromov, Dilshod Murtazoev, Bahodir Halilov endi o'zini ko'rsatib kelmoqda. Bu yigitlar kelajakda milliy terma jamoaning o'zagi bo'la oladi. Lekin hali ularda o'yin amaliyoti kam. Terma jamoaning o'quv-mashg'ulot yig'inlaridan kimlardir norozi bo'lgan. Agar u terma jamoada o'ynamasa qaerga qarab o'sadi? Superliga bilan Pro liga, Yoshlar ligasi o'rtasida farq katta. Siz yoshlar ligasida o'ynayotgan futbolchi bilan Yaponiya bilan o'ynab kelishingiz noreal narsa. Futbochini o'ynatmasligida Superliga klublari aybdor emas. Hali bular yosh. Murabbiylarning ham o'z vazifasi bor. Sizni Franciya chaqirsa bormaysizmi? FIFA kunida Argentina taklif qilsa o'ynamaysizmi? Bu vatan uchun sharaf. O'zbekistonni o'ziga raqib deb bilyapti. Franciya, Urugvay, Argentinaga boryapmiz. Koreya Respublikasi biz bilan o'ynadi. Ular ham tayyorgarlik ko'rdi. O'sha kuni Osiyo chempionatiga etib kelmayapti. Xalqaro o'yinlar futbolchilarga katta tajriba bermoqda. Terma jamoa FIFA kunida yig'ilmasa, xalqaro o'yinlarda qatnashmasa. Bu O'zbekistonning bolalari. Qaysidir gap-so'zlarga ishonib ularning yo'lini to'smaslik kerak. Ularni faqat terma jamoa shakllantirib bera oladi. Klublarida ham vaqti kelib o'ynaydi. O'tgan yili 4-5 nafar futbolchi jamoasida asosiy tarkibda o'ynagan. Hozir har bir klubda 2005-2006 yil futbolchi bor. Bu degani joriy mavsumda yana o'ynashadi. Ammo ularga vaqt kerak. Ungacha terma jamoa klubga tayyorlab beradi. Biz klublarning murabbiylariga rahmat aytamiz. Franciya, Argentinaga Abdug'afur Haydarov, Asilbek Jumaev, Amirbek Saidovlarsiz borganmiz. Sababi murabbiy bu o'yinchilarni asosiy tarkibga tayyorlashini aytdi. Men xursand bo'lib qoldiraman. Superliga, Pro liga darajasidagi futbolchilar katta o'yinlarda bilinadi. Tajribasi hisobiga boshqacha bo'ladi. Behruz Jumatov terma jamoa bo'lmasa bir yil hech qaerda o'ynamadi. Terma jamoada o'smoqda. Uni tashlab qo'ysangiz yana bir iqtidorni yo'qotasiz. Maqsad milliy terma jamoa. Klubida o'ynasin deyilmoqda, lekin ular yoshlar ligasida o'ynaydigan vaqtdan o'tdi. Endi ular boshqa darajaga chiqishi kerak. Asosiy tarkib bilan mashg'ulot qilish va maydonga chiqib o'ynash umuman farqi bor.

- Lazizbek Mirzaev va Amirbek Saidov raqobatda yutqazdimi yoki jarohat sabab o'zini ko'rsata olmadimi?

- Klub bilan gaplashganimizda "Leganes" chempionatga yuboramiz dedi. Lekin biz kutgan formada emasdi.

- Bu terma jamoa 2028 yilgi Olimpiadaga tayyorgarlik olib boradi. Terma jamoani o'zingiz boshqarishda davom etasizmi?

- Oldimizga qo'yilgan vazifani bajara olmadik, Jahon chempionatiga chiqolmadik. Demak taqdirimiz rahbariyatga bog'liq, ishdan bo'shatishsa qabul qilaman. Terma jamoa katta ehtimol bilan boshqa murabbiyga berilsa kerak. Men ishdan ketishdan qo'rqmayman. Futbolchilarimga hech qanday etirozim yo'q.

Matbuot anjumani. Farhod Nishonov: "Ishdan ketishdan qo'rqmayman, omadsizlik tufayli yutqazdik, terma jamoaga korrupciya aralashgani yo'q"