O'yindan so'ng "Olimpik Mobiuz" yordamchi murabbiyi Maxsudjon Zokirov matbuot anjumanida ishtirok etdi.

- O'yin haqida fikringiz?

- Avvalambor "FarDU" jamoasini bugungi g'alaba bilan tabriklayman. Biz ham g'alaba uchun maydonga tushgandik, ammo omad yuz o'girdi. O'z xatoimiz tufayli gollar o'tkazib yubordik.

- Rustambek Fomin bugun ancha orqaroqda o'ynadi?

- Rustambek bizda tayanch yarim himoyachisi sifatida harakat qiladi. Unga bugun himoyaga ko'proq yordam berish vazifasi topshirilgandi. U qo'ldan kelgancha vazifani bajarishga harakat qildi, lekin tarkibimizdagi hamma ham o'z ishini yaxshi bajargani yo'q. Xatolar juda ko'p bo'ldi. Endi bu xatolarni to'g'rilash ustida ish olib boramiz.

- Yil boshida jamoa oldiga Superligaga chiqish vazifasi qo'yilgandi?

- Har bir o'yinda yutuq uchun maydonga chiqamiz. Garchi yutqazgan bo'lsak-da, bu maqsaddan qaytmaymiz va harakat qilishda davom etamiz. Hali hammasi tugagani yo'q.

Maxsudjon Zokirov: "Bugungi o'yinda xatolar ko'p bo'ldi"