Bir paytlar "El Klasiko"ni ajoyib paslari bilan bezagan, "bundestim"ning asosiy figurasi bo'lgan Mesut bugun yashil maydonning tashqarisida.

U Turkiya prezidenti bilan tushgan rasmi tufayli Germaniyada protestga uchraganidan keyin terma jamoadagi faoliyatini yakunlagandi (2018).

2020 yilda esa Uyg'ur musulmonlarini himoya qilgani uchun "Arsenal" rahbariyati tomonidan tarkibdan chiqarib tashlandi.

O'zil shundan keyin Istanbulga yo'l olib, bolalikdagi orzusi - "Fenerbahche" tarkibiga qo'shildi. Buning uchun MLS va arab klublaridan kelgan jozibali takliflarni rad qilib, dastlabki 6 oy tekinga o'ynashga rozi bo'ldi.

Garchi turk emas, olmon terma jamoasini tanlagan bo'lsa ham, Istanbulda O'zilni qadrlashadi. U yakuniga etgan mavsumni "Fener" sardori sifatida boshladi.

Ammo joriy yilning mart oyida xuddi "Arsenal"da bo'lgani kabi tarkibdan chiqarib tashlandi. Bunga sabab sifatida jamoa ustozi Ismoil Kartal bilan janjallashib qolgani aytildi...

Bir necha kun oldin "Fenerbahche" murabbiylar shtabida o'zgarish ro'y berdi. Afsuski, jamoani qabul qilib olgan portugaliyalik Jorge Jezus ham O'zilning xizmatlariga ehtiyoj sezmasligini bildirdi. Aniqrog'i, Mesutning bolalikdagi orzusi 33 yoshli yarim himoyachidan voz kechyapti.

Ammo O'zilning o'zi Istanbuldan ketishni istamayapti. U tvitterdagi sahifasi orqali yakuniy qarorini malum qildi: "Fenerbahche"ga faoliyatimni yakunlash uchun kelganman. Jamoa bilan yana 2 yilga amal qiladigan shartnomam bor. Bu muddat ichida hech qanday takliflarni ko'rib chiqmayman va 2024 yilda butsalarimni mixga ilaman.
Rahbariyatning men to'g'rimdagi qaroriga hurmat bilan qarayman va har doim "Fenerbahche"ga yordam berish uchun tayyor holatda bo'laman".

Sizning bu masaladagi fikringiz qanday? Jamoangizda Mesut O'zil bo'lsa, uni tarkibdan chiqarib yuborarmidingiz?

Messi va Estoniya termasi haqida

Mesut O'zil hozir qaerda?