U bitta mavsumda “Metallurg”ning raqiblar darvozasiga eng ko'p gol kiritgan o'yinchisiga aylandi. Z.Abdullaev 2016 yilgi mavsumda raqiblar darvozasiga 18 ta gol kiritdi va chempionat to'purarlari ro'yxatida faqatgina Temirxo'ja Abduxoliqovdan ortda qoldi xolos. Temurxo'ja Zohidni to'rtta to'pga ortda qoldirgan bo'lsa, Abdullaev o'z navbatida eng yaqin taqibchilari SH.Norxonov hamda S.Mirzaevlardan to'rtta to'pga ilgarilab ketdi.

Zohid Abdullaevdan tashqari “Metallurg” bu mavsum Dilmurod Karimov (8), Murodjon Toshmatov (7), Javohir Esonqulov (4), Ayubxon No'monov (2), Jahongir Abdumo'minov (2), Doniyor Odilov (1), Saidjon Abdujabborov (1), Ergash Ismoilov (1), Islomjon Qobilov (1) va Jasur Hakimov (1) lar o'z nomlarini tabloga yozdirib qo'yishdi. Yana bitta gol “Sho'rtan” jamoasi himoyachisi Hasan Ergashev tomonidan o'z darvozasiga kiritilgan – avtogol.

Yana Zohid Abdullaev natijalariga qaytadigan bo'lsak, uning oliy liga bahslarida kiritgan jami gollari soni 67 taga etdi. Shulardan 63 golini u “Metallurg” jamoasi tarkibida raqiblari darvozasiga urgan. To'rt marta esa “Nasaf” jamoasida muvaffaqiyatga erishgan. O'zbekiston kubogi bahslarida ham 9 ta gol urgan Zohid Abdullaev (4 ta “Metallurg”, 5 ta “Nasaf” safida) ning jami gollari soni 76 tani tashkil etadi. Gennadiy Krasnickiy klubiga azo bo'lishi uchun Zohid raqiblar darvozasini yana 24 marta ishg'ol etishi lozim.

2016 yilgi mavsum uchrashuvlarida hakamlar “Metallurg” jamoasi yarim himoyachisi Dilmurod Karimovni 7 marta ogohlantirdi. Sariq kartochkalar bois Dilmurod bitta uchrashuvni o'tkazb yuborishga majbur bo'ldi. Bu yilgi chempionatda “Metallurg”ning yana 13 o'yinchisi hakamlar tomonidan sariq kartochka bilan jazolanishdi: J.Esonqulov – 6, Z.Abdullaev – 6, D.Odilov – 5, D.Karimqulov – 5, I.Qobilov – 4, S.Sultonov – 3, H.Hoshimov – 3, S.Abdujabborov – 3, J.Abdumo'minov – 3, M.Sulaymonov – 2, M.Toshmatov – 2, A.No'monov – 2, SH.Jalilov – 1.

Doniyor Odilov sariq kartochkalarining ikkitasini bitta o'yinda olganligi bois u qizil kartochkaga aylangandi. Shuningdek, Jahongir Abdumo'minov bir marta maydondan chetlatilgan.

“Metallurg-2016”: Zohid Abdullaev - klub to'purari