Mamlakatimizda umumxalq bayrami – Navro'zi olam keng nishonlanayotgan kunlarda Bekobod shahri yana bir qulaylikka ega bo'ldi.

Mehr-muhabbat, sahovat ayyomida "Metallurg" futbol klubi shahar aholisi uchun "Mehrjon" sport sog'lomlashtirish markazini taqdim etdi. "Metallurg" markaziy stadionida ochilgan bu mo'jaz maskan shahar aholisini, imkoniyati cheklangan bolakaylarni xursand qildi.

Barcha zarur jihoz, anjomlar bilan taminlangan holda kapital tamirdan chiqarib, foydalanishga topshirilgan sport zali imkoniyati cheklangan bolalar uchun ko'ngil ochish maskaniga aylanishiga shubha yo'q. Malakali mutaxassis – murabbiylar yordamida ular bu maskanda o'z salomatliklarini tiklash barobarida yangi do'stlar bilan tanishishadi. O'zlarini qiziqtirgan mavzularda muloqotda bo'lishadi.

"Mehrjon" sport sog'lomlashtirish markazining tantanali ochilish marosimida O'zbekiston metallurgiya kombinati AJ boshqaruvi rahbariyati, klub mutassaddilari, "Metallurg" murabbiylar shtabi va taniqli futbolchilari ishtirok etishdi.

So'zga chiqqan “Metallurg” PFK bosh murabbiyi Luisma Ernandes, "Gennadiy Krasnickiy klubi" azosi Zohid Abdullaev, jamoa vice-sardori Fozil Musaev sport sog'lomlashtirish maskani xodim va azolarining faoliyatlarida omad yor bo'lishini tilashdi.

Bekobod shahri madaniyat uyi sanatkorlarining chiqishlari tadbirga qo'shimcha fayz bag'ishladi. Tadbir so'ngida tantanali ochilish marosimiga tashrif buyurgan bolakaylar uchun esdalik sovg'alari tarqatildi. Imkoniyati cheklangan bolalar uchun bayram dasturxoni tuzaldi, shirinliklar ulashildi.

"Metallurg "Mehrjon" sport sog'lomlashtirish markazini ochdi