Men ko'p achinmadim. Agar Nuraliev tarkibida yoshi kichraytirilgan birorta bola yo'q bo'lsa, shuning o'zi eng katta yutuq (bunga ishonishim qiyin). Tojikiston Osiyo Chempionatiga chiqdi, biz esa qoldik qabilida xabar yozib tashlayveramiz. Lekin ishontirib aytamanki, yaqin 10 yilda Tojikiston milliy termasi yaqinimizga ham kela olmaydi. Bundan keyin ham shunday bo'lishi katta ehtimol. Vaholanki plankani Tojikiston yoki o'zimizdan kuchsiz boshqa termalar bilan olishimiz xato. Unuting ularni, biz yuqoridagilarga intilishimiz kerak.

Biz 1 yillik ciklni boy berdik. Ammo bu fojea emas. Haqiqiy fojea biz hali ham eski karom sho'rvani ichishda davom etayotganimiz. Xuddi mana shu Nuraliev 2012 yil O'zbekiston U16 termasi bilan Osiyo Chempioni bo'la olgan, uning tajribasiga shubha yo'q. Biroq shaxsan menga yoshi “o'qlangan” futbolchilar bilan qo'lga kiritiladigan yutuq kerak emas, umuman. Oradan 5 yil o'tib ko'rmoqdamizki, eski uslubdan yurganimiz foyda keltirmadi. Polshaga borib Belgiya, Portugaliya kabilar qatnashgan turnirda o'ynaganimiz, Qozog'istondagi xalqaro musobaqaga uchib kelganimiz zoe ketdi, to'g'rimi? Chunki biz yo'nalishlarimizni rivojlantirmadik, o'sha-o'sha mexanizmni Nuraliev yana chempion qilib beradi deb ishondik.

Ha, gap markaz haqida. U tashkil etilganidan ikki oy o'tib ishga kirishgan Asqar Tolibjonov, to markaz yopilguniga qadar bosh rolda bo'ldi. O'FF yangi rahbariyati katta ehtimol bilan shunga o'xshash markazni qayta ishga tushiradi (nega yopilganini aytishmagan, nega ochilayotganini esa aytishadi). Tolibjonov ishdan ketgani haqida hech qanday malumot yo'q. Vaholanki, o'smirlar termasining hatto qita chempionatiga ham chiqa olmagani eski siyosatga barham berish kerakligini anglatib turibdi. Bo'ldi, uning uslubi etib keldi, tag tomiri bilan chirib ketdi. Unga hozir Dilshod Nuraliev ham, boshqasi ham yordam bera olmaydi.

Chunki bugun qitaning qolgan mamlakatlari ancha o'sdi, ular o'z uslublarini, yo'nalishlarini takomillashtirdi. Biz esa oqimdan tushib qolmaslik uchun yangi qonga muhtojmiz. Tolibjonov o'sha qonni quyib bera oladigan yagona inson bo'lsa, men ikki qo'limni ko'taramn, boshqa gapim yo'q. Mayli, “Paxtakor”ga qaytsin (klub Umid Ahmadjonov istefosi haqida rasmiy xabar bermadi, balki o'rniga odam kerakdir, balki “Paxtakor”dan ketib ulgurmagandir, bilmaymiz), balki boshqa variantlar chiqib qolar Tolibjonovga. Hozir esa hammasini o'zgartirishning ayni vaqti. Saudiyadagi natijani ko'rib, xayolimga shundan boshqa fikr kelmadi. Nuralievni tanqid qilib, olib tashlab hech narsaga erishmaymiz. U murabbiy, ishini qiladi. Teparoqdagilar esa yana Olimxo'jaevni, yana Evstafeevni olib kelaveradi. Zamon esa bamaslahat ish qilishni, kelishishni, tiyilishni va birgina shaxs vakolatlarini kamaytirib tashlashni talab qiladi.

Xullas, Germaniya havasida yashayveramiz. Uning U16 si ham, Lyovning Germaniyasi ham bitta relsga tushib olgan. Bizda Nuraliev aravada yo'lga chiqsa, teparoqda Babayan teplovozda kutib oladi, boshqasi yana boshqa bir falsafani ilgari suradi. Tolibjonov esa bu haqda emas, Nuralievning o'rniga kimni qo'yish va muvaffaqiyatsizlikni qanday izohlashni ko'rpoq o'ylaydi. Bu yaxshi emas, o'rtoqlar...

Milliy terma sokin tin oldi. O'smirlar ham charchadi. Eski rahbariyat yangilar bilan javlon urishga tayyormi?