- Biz o'zimiz xohlagandek o'ynadik. Birinchi uchrashuvda ikkita to'p farqi bilan yutganimiz tufayli ham yuqori ishonch bilan harakat qildik. Qiziqarli bellashuv bo'ldi.

Chiziqlar, futbolchilar orasidagi tushunishlar ancha joyiga kelmoqda. Jamoamiz yaxshi kombinacion o'yin ko'rsatdi. Lekin yaratilayotgan vaziyatlardan unumli foydalanish koefficienti past darajada. Biz bu muammo ustida ish olib boramiz.

Avval ham aytganman, statistka ham shuni ko'rsatmoqda. Biz gol urishda oqsaqlanmoqdamiz. Biz buni bartaraf etish ustida jiddiy ish olib boramiz. Boshqa raqiblar bu kabi ko'p vaziyatlar yaratishga imkon bermasligi mumkin. O'shanda bir dona imkoniyatdan samarali foydalanish lozim bo'ladi.

- "Bunyodkor" jamoasi joriy mavsumda ancha qiynalib qoldi. OCHLga yo'llanmani qo'lga kiritish chempionatdan ko'ra kubok orqali engilroq ko'rinmoqda. Lekin kubok bahslarida ham "Lokomotiv", "Nasaf" singari kuchli jamoalarga ushbu mavjud tarkib bilan kurashish qiyin bo'ladi. Ikkinchi davrada qaysi chiziqni kuchaytirmoqchimiz?
- OCHL yo'llanmani qo'lga kiritish uchun eng yaqin yo'l - bu kubok o'yinlari orqali. Bizning asosiy vazifa jamoaning eski madhiyasini qaytarish. Jamoamizdagi vaziyat og'ir. Davralar oralig'ida jamoani kuchaytirishimiz lozim. Avvallari futbolda o'rta chiziqqa qarab jamoaga baho berilardi. Hozirgi zamonaviy futbolda esa zaxira o'rindig'i uzunligiga ko'p narsa bog'liq. Shu uchun ham ikkinchi davrada imkon qadar futbolchilarni taklif etishga harakat qilamiz. Men oldindan bashorat qilishni yoqtirmayman. Agarda finalga chiqsak, kim bo'lishidan qatiy nazar ular bilan kurashamiz va maydonda jonimizni beramiz.

Aynan qaysi chiziqlarni kuchaytirmoqchimiz? Imkon qadar barcha chiziqlarni kuchaytirishimiz lozim. Ikkita bir-biriga raqobatbardosh tarkibni shakllantirishimiz kerak.

- Mirjamol Qosimovning o'yinlari kuzatib borib, sizning harakatlaringiz esga tushmoqda. Lekin unga sizning o'g'lingiz bo'lgani bosim yuklayotgandek ko'rinmoqda. Kelajakda qanchadan keyin o'g'lingiz siz ko'rsatgan futbolni o'ynay oladi, deb o'ylaysiz?
- O'g'lim to'g'risidagi gapiradigan bo'lsam, albatta bu bosim yuklaydi. Buni avvalo uning o'zidan so'rash kerak. Lekin men bilaman, uning maydonni ko'rishi va to'p oshirib berishi faqat o'ng oyoqda. Lekin muhimi futbol o'ynashni biladi. Kelajakda yaxshi futbolchi bo'lishi o'ziga bog'liq. Ishlashla, mehnat qilishda davom etishi lozim. To'xtab qolish yaramaydi. Mirjamol uyda meni o'g'lim. Ishda esa barcha qatori futbolchi. U Qosimov bo'ladimi, Hamdamovmi yoki Zuhurovmi farqi yo'q. Bu jamoa. Qo'l ostimdagi har bir futbolchi men xohlayotgan va talab qilayotgan futbolni ko'rsatishi kerak. Ular o'z ustida ishlashsa, kelajakda barchasi yaxshi futbolchi bo'lib etishadi. Futbolda hakam xushtagidan keyin muxlislar uchun o'ynash lozim. Final xushtagi yangragunga qadar maydonda ter to'kish zarur.

- Eron terma jamoasini faqat sizning qo'l ostingizdagi terma jamoamiz yutgandi. O'shanda jamoani qanday ruhlantirgansiz. Eron bilan o'yinimizdan oldin terma jamoa murabbiylariga qanday maslahat bergan bo'lardiz?
- Eron bilan o'yin haqida? Birinchi navbatda terma jamoamizga omad tilayman. Kim Eronni yutgan, kim yutqazgan bu ahamiyatsiz. Barchamiz g'alaba kutmoqdamiz. "Ozodi"da 100 ming ishqiboz qarshisida o'ynash bu oson ish emas. Bu o'yin eronliklar uchun finalga teng. O'yin juda og'ir va asabiy ruhda o'tadi.

Lekin bu futbol. Futbol bu avvalo jamoaviy o'yin. Har bir jamoada futbolchilar orasida bo'shliqlar paydo bo'ladi. Shundan unumli foydalanish kerak. Terma jamoamiz futbolchilari o'z harakatlari orqali Eronni xato qilishga majbur etishi va birgina imkoniyatdan ham samarali foydalanmog'i kerak. Shunda ularni mehmonda ham mag'lubiyatga uchratsa bo'ladi. Men bunga ishonaman.

Mirjalol Qosimov: "O'zimiz xohlagan futbolni namoyish etdik"