Rossiyaning "Volga" klubiga qarshi kechgan bahsda olmaliqliklar 1:2 hisobida imkoniyatni boy berdi. Albatta, bunday o'yinlarda natija oxirgi darajali hisoblanadi. Murabbiylar jamoaning holati, xato va kamchiliklarni ko'rib olishga harakat qilishadi. Yangi futbolchilar sinovdan o'tkaziladi. AGMK ustozi Mirjalol Qosimov ham fikrimizga qo'shilgan holda ayrim savollarimizga javob berib o'tdi.

"Bu yig'inlarda natijaga etibor berish kerak emas. Jismonan tayyorgarlik yaxshi darajaga chiqishi muhim. Ertalab ham mashg'ulot bo'ldi. Charchoq alomatida futbolchilarning harakatini tekshirib olish, qolaversa, jamoaga qo'shilgan yangi futbolchilarni bir-biri bilan tushunib olishi kabi jarayonlardan o'tishimiz lozim. Maqsadimiz – chempionat bahslariga jismonan tayyor holda etib borish", – deya gap boshladi Mirjalol Qosimov.

- Jamoaga taklif qilingan legionerlarning qaysi hislatlari maqul keldi? Tarkibdagi o'zgarishlar haqida fikringiz...

- Himoyani kuchaytirishimiz kerak. Anzur Ismoilov va Sardor Rahmonov bor. Oldinda Superliga, Kubok va OCHL o'yinlarida ishtirok etamiz. Chempionat uzoq, har bir poziciyaga 2 tadan futbolchi bo'lishi kerak. Shuning uchun ham tunislik futbolchini taklif qildik, gruziyalik qanot yarim himoyachini oldik. Ular birinchi marotaba maydonga tushishdi. Vaqt ko'rsatadi, bu o'yin bilan xulosa qilib bo'lmaydi. Iloji boricha jamoani jismonan tayyorlayapmiz.

- Yig'in davomida yana yangi nomlar kelishi mumkinmi?

- Yana bitta joyimiz bor. Vaqtimiz ko'p qolmadi. 15 fevralda transfer oynasi yopiladi. Bir nechta o'yinlar o'tkazamiz, jiddiy hozirlik ko'rishimiz kerak.

- O'rtoqlik uchrashuvlaridagi raqiblar bosqichma-bosqich kuchayib boradimi?

- Qozog'iston, "Metallist", Moldova jamoasi bilan o'rtoqlik o'yinlari o'tkazamiz. Shu o'yinlar orqali tayyorgarlik ko'ramiz.

- Shahboz Beg'amovning ketishi jamoani yani kollektivni kuchsizlantirdimi?

- Hayot shunday. O'zining qarori, biz ketkazmadik. Xayrlashdi, yomon tarafi yo'q. Bizdan yaxshiroq joy bo'lsa, o'yinchilarni ham ushlab o'tirmaymiz.

- Jamoa o'yinlarni "Jar" stadionida o'tkazadimi?

- Maqsadimiz – AGMK maydoni chimi, projektorlarini yangilash. Rahbarimiz katta yordam beryapti, etibor qaratmoqda. Ularga minnatdorchilik bildiraman. Stadionga kelgan odamlar chiroyli o'yin ko'rishni, ishdan tashqari hordiq chiqarishni istaydi. Maydonning sifati yaxshi bo'lishiga ham ko'p narsa bog'liq. Rahbarimiz shuncha ishlari bo'lsa ham futbolga etiborsiz emaslar.

- Vitaliy Denisovning kelishi raqobatni oshirdimi?

- O'tgan yili ham aytgandim. Kimligidan qati nazar, yoshmi yoki tajribalimi, raqobat bo'lishi lozim. Tayyorgarlik, mashg'ulotlarga boshqacha yondashadi. O'sishga erishadi, nafaqat o'ziga, balki jamoaga katta foyda keltiradi. Raqobat bo'lmasa qiyin. Chunki o'tgan yili Shohruh Gadoevni Akram Komilovning poziciyasida o'ynatgandim. Jarohatlar, kartochkalar bo'lishi ehtimoli yo'q emas. Shu bois har bir poziciyada 2 tadan futbolchi bo'lishi tarafdoriman.

Mirjalol Qosimov - Vitaliy Denisov, Shahboz Beg'amov va tarkibdagi o'zgarishlar haqida