"Nasaf" va "Navbahor" jamoalari o'rtasidagi bahs murosasiz va shiddatlarga boy tarzda o'tdi desak mubolag'a bo'lmaydi. Hisobda ikki bor oldinga chiqib olgan "lochinlar" yakunda 2:2 natijasidagi durangga imzo chekishdi. O'yin yakunlangach birinchi gol muallifi Mirzohid G'ofurovga yuzlandik.

"Uzoq muddatdan keyin yana yashil maydonga qaytganimizdan xursandman. "Nasaf"ga qarshi o'yin qiyin bo'lishi oldindan malum edi. Qarshida to'p tepish hech bir jamoaga oson emas. Hozirda Superliganing barcha jamoalari qiynalmoqda. Uch, to'rtta turdan so'ng yana iziga tushib olsa kerak. Ha, o'tgan mavsum aksariyat o'yinlarda hisobda ortda borayotib iroda ko'rsatgan edik. Bu yil esa hisobni ushlab qola olmayapmiz.

Nazarimda omad bizdan yuz o'girmoqda. Kecha ham bazi bir kichik xatolar evaziga g'alabani qo'ldan boy berdik. Murabbiyimiz qaerda xatolar qilganimizni aytdi. Hozirda butun dunyoda tarqalgan pandemiya sababli muxlislarsiz to'p tepishga majburmiz. Uyda ham, safarda ham ularning daldasini his qilib o'ynaymiz. Qaerga bormaylik jonkuyar ishqibozlarimiz doim biz bilan birga bo'lishardi. O'ylaymanki teleekran ortida sanoqsiz muxlislar bizni olqishlab turishdi",- deydi Mirzohid G'ofurov.

Mirzohid G'ofurov: "Bazi bir kichik xatolar sabab g'alabani qo'ldan chiqardik"