Ammo so'nggi turlarda 1-o'rinni hamshahari “Obod”ga “berib” qo'ydi. Yakunda esa Ildar Sakaev boshqaruvidagi “Oq-tepa” oliy ligada 15-o'rinni band etgan klub bilan pley-off bahsini o'tkazadigan bo'ldi. Biz esa jamoaning asosiy posboniga aylanib ulgurgan Mixail Naumov bilan suhbatlashib, ayrim savollarga javob oldik.

- Misha, kayfiyatlar qanday? Nima yangiliklar?

- O'rtacha. Bugundan jamoamiz o'z qarorgohida yig'iladi va finalga teng bo'lgan o'yinga tayyorgarlikni boshlaydi. Aytarli boshqa yangilik yo'q.

- Jamoangiz chempionat yakunlanib borayotganida yaqin taqibchisi bo'lmish “Obod”ni o'tkazib yubordi. Bu sizlar uchun kutilmagan zarba bo'ldimi?

- Ha. So'nggi lahzalarga kelganda bu juda alam qiladi. Hammasi o'z qo'limizda edi. Ammo bir necha bor jiddiy xatolarga yo'l qo'ydik. Bu esa yaqin taqibchimizga qo'l keldi. Aksiga olib “Obod” qolgan o'yinlarda mag'lub bo'lmadi. Yakunda esa peshqadamlik qo'lga oldi. Biz eng avvalo “Orol” va “Mashal-2” bilan o'yinlarda g'alaba qozonishimiz kerak edi. Shunda oliy ligaga to'g'ridan-to'g'ri yo'llanmani qo'lga kiritgan bo'lardik.

- Jamoada ichki muhit yaxshimi?

- Hammasi ko'ngildagidek. Hamma birga.

- Endilikda jamoangiz asosiy etiborini pley-off o'yiniga qaratadi?

- Shunday. Oliy liga jamoasiga qarshi kechadigan bahsda ham astoydil o'ynaymiz. Imkoniyatlar 50x50 degan bo'lardim. Har ikki jamoa uchun ham finalga teng o'yin bo'ladi.

- Qaysi klub sizlarga qarshi maydonga tushadi deb o'ylaysiz?

- Menimcha Samarqandning “Dinamo” jamoasi bo'lsa kerak.

- Sizningcha oliy liga bilan qaysi jamoa xayrlashadi?

- “Buxoro”.

- Chempion jamoachi?

- "Paxtakor" bunga juda yaqin turibdi.

- Kelgusi mavsum uchun homaki rejalaringiz qanday?

- Albatta oliy ligaga qaytishni istayman. Hozircha aniq takliflar yo'q. Agarda pley-off o'yinida omadimiz chopsa, “Oq-tepa”dagi faoliyatimni davom ettiraman.

Islombek Rustambekov suhbatlashdi.

Mixail Naumov: “Pley-offda “Dinamo” bilan o'ynasak kerak”