Шунингдек жамоанинг аксарият футболчиларига ҳам таклифлар келиб тушаётгани ҳақидаги хабарлар қулоғимизга чалинаётгани рост. Муборакликларнинг маҳоратли футболчиси Мўмин Мелиев ҳам кейинги мавсумни бошқа жамоада бошлаш арафасида. Бу борада унинг ўзи қандай фикрда?

"2019 йил Про лигада биринчи ўринни эгаллаб жамоамиз билан элитага қайтдик. Гарчи икки йил қуйи лигада иштирок этган бўлсакда Суперлигага мослашиш қийин кечмади. Барча учрашувлар қизиқарли ва шиддатли руҳда ўтди.
Имкониятларимни тўлиқ кўрсата олдим дея олмайман. Кейинги мавсумда ўзимнинг энг яхши ўйинларимни кўрсатишга ҳаракат қиламан.
Жамоамиздаги пасайишни яқинларим ҳам айтишди. Карантиндан сўнг бундай ҳолат кўпчиликда кузатилди. Машғулотларда кутилмаганда жароҳат орттириб олдим ва бир ойга яқин тикланиш жараёнини олиб бордим. Менимча шу омиллар ҳам сабаб бўлди.
Қайси жамоага ўтганим янги йилдан сўнг расман аниқ бўлади. "Насаф"дан таклиф? Бу жамоа кучли мураббийга эга. Жамоада яхши савиядаги футболчилар йиғилган. Клуб мухлислари фахрланса арзийди. Уларни кумуш медаллари билан табриклайман. Айтганимдек янги йилдан кейин барчасига аниқлик киритамиз.
"Машъал" жамоасининг жонкуяр мухлисларини келаётган байрам билан табриклайман. Оилаларидан файз ва барака аримасин",- дейди Мўмин Мелиев.

Мўмин Мелиев: "Янги йилдан сўнг қайси жамоага ўтганим аниқ бўлади"