Mersisayddagi uchrashuv Toshkent vaqti bilan 01:15 da start oladi. Mazkur bahsda asosiy intriga ikkala murabbiy - Joze Mourinyu va Karlo Anchelotti o'rtasida ro'y berishi kutilmoqda. O'z vaqtida jahonda kuchlilar reytingini boshqargan mutaxassislar faoliyatida "cho'kish" ro'y beryapti go'yo. Bundan 5-6 yil muqaddam Mourinyu, Anchelotti singari murabbiylar "Tottenxem"-u "Everton"lar yuborgan xatni pochta qutisidan olish uchun egilib ham o'tirmasdi...

Malumot uchun, bugungi bahs ikkala murabbiy o'rtasidagi 8-rasmiy o'yin hisoblanadi. Portugaliyalik "benazir" Italiyaning "Karlo otasi" bilan ilk bor 2003 yilning avgust oyida "uchrashgan" edi. "Portu" va "Milan" o'rtasidagi UEFA superkubogi uchun bahs "rossonerilar"ning kichik hisobdagi g'alabasi bilan yakunlangan, o'yin taqdirini hal qilgan yagona gol Andrey Shevchenkoning nomiga yozilgan edi.

Keyinchalik "ikki nahang" Milan derbisi, Evropa Chempionlar Ligasi va Angliya chempionatida kuch sinashib ko'rishdi.

sana	musobaqa	mavsum	tur	uy	hisob	mehmon
13.09.2020	APL	20/21	1	Tottenxem	0:1	Everton
06.07.2020	APL	19/20	33	Tottenxem	1:0	Everton
16.03.2010	ECHL	09/10	1/16 final	Chelsi	0:1	Inter
24.02.2010	ECHL	09/10	1/16 final	Inter	2:1	Chelsi
15.02.2009	A Seriya	08/09	24	Inter	2:1	Milan
28.09.2008	A Seriya	08/09	5	Milan	1:0	Inter

Guvohi bo'lganingizdek, o'zaro bahslarda 3 bor Anchelotti boshchiligidagi jamoalarning qo'li baland kelgan bo'lsa, 4 o'yin yakunida Mourinyu shogirdlari g'alabani tantana qilgan. Qiziqarli jihati shundaki, ikkala murabbiy o'rtasidagi bahslarda hech qachon durang natija qayd etilmagan va barcha uchrashuvlarda g'olib 1 to'p farqi bilan zafar quchgan. Demak, bugungi bahsdan shiddatli o'yin kutishimiz uchun asoslar etarlicha. Bugun ham futboldan zavq olishni istasangiz, evrofutbolning zabardast murabbiylari orasidan ajralib, mo'ysafid mutaxassislar safiga qo'shilishga ulgurgan "benazir" va "Karlo ota" o'rtasidagi "jang"ni o'tkazib yubormang!

Mourinyu va Anchelotti o'rtasidagi 8-to'qnashuvni o'tkazib yubormang!