БУЮК ҒАЛАБАЛАРГА ИНТИЗОМ ОРҚАЛИ ЭРИШИЛАДИ!

("Одамлар орасида" газетасининг 2007 йил 22 март сонидан олинган).

Мухлис халқи доимо янги мавсумга янги умидлар билан кириб келиши анъанага айланиб қолган. Шу умидларнинг қисман бўлса-да рўёбга чиқиши эса қанчалик қувонч келтиришини айтмай қўя қолайлик. Бу йилги умидларимиз асосан терма жамоаларимиз билан боғлиқлиги ҳам сир эмас. Шундай экан, келинг терма жамоаларимиз манфаатидан келиб чиқиб сўнгги воқеаларга баҳо берайлик.

Бир: АлмаТВ кубоги

Турнир арафасида бош мураббий Рауф Инилеев билан суҳбатлашганимизда, у киши "нима қилиб бўлса ҳам турнирда биринчи ўринни эгаллаш керак" деган масала қўйилмаганлигини айтиб ўтди. Мусобақалар давомида ҳам биз вакилларимиз учун таркибни аниқлаш муҳимроқ аҳамиятга эга эканлигини кўрдик. Айниқса, бош мураббийнинг ўзи хуш кўрган модел – тезкор ва комбинацион ўйин талабларига жавоб бера оладиган йигитларни излаётгани яққол сезилиб ҳам турди. Афсуски, АлмаТВда бу борада янги кашфиётлар қила олганимиз йўқ. Сўнгги, Қозоғистон билан ўтган учрашувда майдонга тушган таркиб оптималликка яқиндай. Лекин Шацких, Денисов, Клецков, Фёдоров ва Ҳайдаров билан ўша таркибни яна бироз кучайтириш мумкинлиги сир эмас. Мен бу ўринда турнирга чақирилган бошқа футболчиларимизни камситмоқчи эмасман, шунчаки, уларнинг кўпчилиги айнан ҳозирги даврда терма жамоамиз ўйинини кучайтириш имкониятига эга эмаслар, деган фикрдаман. Балки улар кейинроқ ўзларини кўрсата олишар. Аммо ҳозир ҳатто турнир тўпурари Улуғбек Бакаев ҳам катта таассурот қолдирмади. Унинг Гейнрих ёки Шацкихга жиддий рақобат кўрсатишига ишонгинг келмайди. Турнирнинг асосий фойдаси – бизнинг энг катта муаммомизни кўрсатиб берди. Бу – ИНТИЗОМ масаласи. Яхшиямки, бу турнир ўртоқлик учрашуви даражасида ва ҳеч қаерда тасдиқланмаган. Бўлмаса ЎФФ ва мураббийлар томонидан қилинган шунча "тоат-ибодатлар" бир пул бўлар эди. Чунки ҳакамга хуруж қилиш (тан жароҳати етказишга интилишни-ку айтмайлик) ОФК томонидан ҳам, ФИФА томонидан ҳам қатъий чоралар билан жазоланади. Ҳаттоки ҳакам бир жамоага ён босган тақдирда ҳам бу ишни қилиб бўдмайди.

"Интизом - ғалабанинг онаси" деган ибора нақадар ҳақ! Қизиғи, биз сўнгги йилларда ана шу нақлнинг ҳақлигини ўз хатти-ҳаракатимиз билан кўрсатиб келяпмиз. Мисол учун, ўша машҳур Ўзбекистон – Бахрайн (1:0) ўйинидаги ҳолатни эслайлик. Бугунгача қоралаб келинган япон ҳакамига ўз интизомсизлигимиз билан имконият яратиб бермадикми? Жепаров тўпни тепаётган пайтда икки футболчимизнинг жарима майдонига кириб олиши ИНТИЗОМСИЗЛИКдан эмасми? Чунки миллий чемпионатимизда, айтайлик, Солиев ёки бошқа номдорроқ ўйинчимизнинг мушугини пишт дейдиган ҳакамлар камдан-кам топилади. Нима, агарда терма жамоа аъзоси бўлса, унга нисбатан алоҳида қонун қўлланиши керакми? Унда биз одамларнинг касбига, лавозимига қараб турли қонунлар яратишимиз керакдир?! Йўқ, агарда футболимиз кўкларга парвоз қилишини истасак, биринчи ўринда унинг қонун-қоидаларига ҳурматда бўлишимиз – унга риоя қилишимиз шарт!

АлмаТВдаги ғалаба кўпроқ қозоғистонлик футбол функционерлари учун муҳимлиги сир эмас. Чунки барча турнирлардаги муваффақиятсизликлар ва 1997 йилги вакилларимиздан олинган (0:4) мағлубиятни ҳастпўшлаш зарур эди. Бунинг учун сўнгги пайтларда "кўп мақталаётган ўзбекларни" енгиш айни муддао саналди. Аммо Пеперс шогирдлари биринчи ўринни қўлга киритган бўлсалар-да, деярли ярим экспериментал таркиб билан ўйнаган жамоамизни енга олишмади. Ҳали яқин вақтлар ичида енга олишмаса ҳам керак. Афсуски, сўнгги дақиқаларда рўй берган вазият дилни хира қилди. Яна ўша ИНТИЗОМ масаласи панд берди. Йўқ, ўзингиз айтинг. Қатарда ҳакам найранглари қурбони бўлганларида бирор мухлис футболчилармизга таъна тошларини отдими? Ёки 1995 йили Нигерияга қарши ўйинда 2:3 ҳисобида енгилганимизда томошабинлар уларни олқишлар билан кузатишмадими? Йўқ, азиз футболчилар! Мухлиспар ҳам "оқ-у қора"ни жуда яхши ажратишади. Агарда сиз сўнгги дақиқалардаги воқеаларни келтириб чиқармаганингизда, биз жамоамиз иштирокини яхши деб баҳолашимиз мумкин эди. Ҳозир эса фанлардан 4 ва 5, ХУЛҚ учун эса 2.

Икки: Олимпия саралаш ўйинлари

Миллий термамиздан фарқли ўлароқ, Пекин Олимпиадаси иштиёқида жавлон ураётган жамоамиз ўйини кўпроқ қувонтирмоқда. Бу ерда натижалардан ҳам кўра ўйиндан-ўйинга янги изланишлари билан такомиллашиб бораётган жамоанинг ўсиши эътиборлироқдир. 14 март куни ниҳоят биз гуруҳимиздаги барча жамоа кучига баҳо бериш имконига эга бўлдик. Очиғини айтганда, Жанубий Кореянинг бир оз устунлиги ўзини тасдиқлади. Корейслар биринчи навбатда юксак, айнан ЮКСАК ИНТИЗОМИ билан бошқалардан ажралиб туришларини кўрсатишди. Бутун ўйин давомида улар фақат бир нарсани, яъни мураббий кўрсатмаларини бажариш ва шу орқали ғалаба қозонишга интилдилар. Агарда бизнинг вакилларимиз Яманга қарши кечган ўйиннинг дастлабки 20 дақиқасидагидек ўйнай олсалар ва интизомни кучайтирсалар, корейс тенгқурларидан қолишмасликлари аниқ.

Уч: Ички чемпионат

Иккинчи турнинг натижаларига тўхталиб ўтиш ниятимиз йўқ. Уларни бизсиз ҳам яхши биласиз. Мавзумиздан келиб чиқиб баъзи бир ҳолатларга тўхталмоқчиман холос. Яна ўша ИНТИЗОМ масаласини қараб чиқиш учун иккинчи тур бизга қўлланма сифатида "Қурувчи" – "Локомотив" учрашувини тақдим этди. Офарин!

Биринчидан, юлдузлар жамоаси деб қаралаётган мезбонларнинг ўйини ҳақида. Бундай клублардаги одатий муаммо, бу яхлит жамоани шакллантириш масаласидир. Бунинг учун "юлдузлар" осмондан тушиб, ердаги қора ишларни ҳам қилишдан тортинмасликлари шарт.

Айниқса, "Қурувчи"нинг ҳужум ва ярим ҳимоя чизиғида ўйнаётган йигитларда бу борада ҳали келишув йўқдек туюлди. Шу боис ҳам "ўзим ураман" шаклида уюштирилган ўндан ортиқ ҳужум шамолга совурилди.

Тажрибали ҳакамимиз Равшан Эрматовнинг ўйин тизгинини қўлдан чиқариши-ю, "Локомотив" ва Олимпия терма жамоамиз "юраги" бўлган Ҳайдаровнинг майдондан четлатлиши ҳам кайфиятни бузди. Ҳа, энди нима ҳам дердик. Касалнинг келиши осон, кетиши қийин.

Иш қилиб шифосини берсин!

Давлат ТУРДИАЛИЕВ.

Мозийга қайтиб... Буюк ғалабага интизом орқали эришилади!