Фарғоналиклар бир қатор легионерларни жалб қилиш қаторида маҳаллий йигитларга ҳам эътибор қаратяпти. Сўнгги мавсумларни "Қизилқум"да ўтказган Муҳаммадали Ғиёсов энди "Нефтчи" шарафини ҳимоя қилади. Унинг янги жамоаси ҳақидаги фикрлари қандай бўлди?

"Нефтчи"да зўр таркиб йиғилмоқда. Албатта бу ерда ўзимда ҳам кучли хоҳиш бўлганини айтишим мумкин. Чемпионлик учун курашадиган жамоага ўтиш фаолиятимда янги чақирув дея оламан. Жамоага ёрдам беришни истайман. Насиб қилса, янги мавсумда тарих яратган ҳолда чемпионликни қўлга киритамиз. Бу жамоа катта янгилик бўла олади. 2025 йилда терма жамоадан чақирув олишни мақсад қилганман. "Қизилқум"да Ислом Кенжабоев, Акаки Шулая билан яхши тандем қилдик. Улардан кўп нарсани ўргандим. "Нефтчи"га мослашиб кетиш қийин бўлмаслигига ишончим комил.

Ортда қолган мавсумга келсак, кўп хулосалар чиқардим. Хабарингиз бор, мавсум бошида жароҳат сабаб кўп вақт йўқотдим. Бу омил ўзимни тўлиқ кўрсатишимга таъсир қилди. Шунга қарамай мураббийимиз Жамшид Саидов кўп имконият бердилар. Тажриба шу орқали келади деб ўйлайман",- дейди Муҳаммадали Ғиёсов.

Муҳаммадали Ғиёсов: "Нефтчи" фаолиятимда янги чақирув бўлди"