Chap qanot vingeri o'tgan mavsum ancha faollik ko'rsatib, ko'pchilikning etiborini o'ziga tortdi deyish mumkin. Shu boois erkin agentga aylangan Hasanovga haridorlar ko'payib ketdi. 25 yoshli futbolchi yakunda “Lokomotiv” variantini tanladi. Shu munosabat bilan Muhammadanas bilan bog'lanib, yangi jamoaga o'tishi va ortda qolgan mavsum bo'yicha bir nechta savollarga javob oldik.

- “Qo'qon-1912” klubi tarbiyalanuvchisi xisoblanasiz. Bu jamoani tark etish qiyin bo'lgandir?

- Shubhasiz, o'zim tug'ilib o'sgan shahar jamoasidan ketish oson kechgani yo'q. Boz ustiga katta futbolga aynan “Qo'qon-1912” jamoasida kirib kelganman. Bir-biridan ajoyib mavsumlarni o'tkazdim. Futbolchi sifatida shakllandim. Shunday ekan, qadrdon jamoamni tark etish qiyin bo'ldi. Lekin bu – futbol. Bilasiz unda bazida shunday o'zgarishlar ham bo'lib turadi.

- "Lokomotiv"ning taklifi nimasi bilan ko'proq sizni o'ziga tortdi?

- Sir emaski, “Lokomotiv” mamlakatimizda o'z o'rniga ega bo'lgan grand jamoalardan biridir. Klub doim o'z oldiga maksimal vazifalarni qo'yib kelgan. Shu sababli ham oldimda turgan variantlar orasida “temiryo'lchilar”ning taklifi men uchun qiziqarli tuyuldi.

- Ortda qolgan mavsum siz uchun 5 balli tizimda, nechchi ballga tortadi?

- Ochig'i bu savolingizni izohsiz qoldirgan bo'lardim. Yaxshisi bunga muxlislar va mutaxassislar javob bera qolsin.

- Yangi jamoada sizni jiddiy raqobat kutib turibdi. Bosh murabbiy bilan shaxsan gaplashdingizmi?

- Raqobat bor joyda o'sish bo'ladi deb bejizga aytishmaydi. Shunday ekan raqobatdan qo'rqmayman. Murabbiy mendan nima xohlayotgan bo'lsa, shuni amalda bajarish va shu orqali jamoaga foyda keltirishni o'ylayman. Albatta, Denis Korostichenko bilan uchrashib, suhbatlashdik. Asosiysi murabbiyning ishonchi yuqori.

- Jamoa oldiga qanday vazifa qo'yilmoqda?

- “Loko”da har doim maqsad va vazifa o'zgarmaydi. Shu jumladan bu yil ham medallar uchun kurashamiz.

- O'tgan mavsum jamoangiz uchun bir nechta foydali gollar urdingiz. Shulardan qaysi birini alohida ajratib ko'rsatgan bo'lardingiz?

- Futbolchi uchun uning har bir goli muhim ahamiyat kasb etadi. To'g'risi, qaysidir urgan golimni alohida ajratib ko'rsatishim qiyin. Urgan gollarim jamoamga foyda keltirsa bundan juda-juda xursan bo'laman.

- 2022 yilda o'z oldingizga qanday shaxsiy maqsadlarni qo'ygansiz?

- Eng avvalo, tezroq yangi jamoamga moslashib ketib, bildirilgan ishonchni oqlashni maqsad qilganman. Qolaversa “Lokomotiv” bilan sovrinlarni yutishni istayman.

- Suhbatimiz yakunida qo'qonlik muxlislarga nima degan bo'lardingiz?

- Albatta, “Qo'qon-1912” rahbariyati, murabbiylar shtabi va muxlislarga o'z minnatdorchiligimni bildiraman. Ishqibozlarning qo'llab-quvvatlashlarini doimo sog'inib qolaman. Barchasi uchun rahmat yana bir bor.

Muhammdanas Hasanov: "Qo'qon-1912"dan ketish oson bo'lgani yo'q"