- O'yin haqida...

- Avvalambor, muxlislarimizni yangi mavsum boshlangani bilan tabriklayman. O'yinga kelsak, yomg'irli ob-havo bo'lishiga qaramasdan, ikkala jamoaning yaxshi tayyorgarlik ko'rgani bilindi.

- O'yindan avval "Qo'qon-1912" favorit hisoblangandi, biroq uchrashuv davomida bunga guvoh bo'lmadik. Jamoa ko'p xatoga yo'l qo'ydi...

- Yuqorida takidlaganimdek, ikkala jamoa ham yaxshi o'yin namoyish etdi. Bellashuv davomida 5-6 ta xavfli vaziyat yarata oldik. Deyarli 80 daqiqa davomida yigitlar bir xil tempda to'p tepishdi. Qolaversa, ob-havo hamda yo'l charchog'i o'z tasirini o'tkazdi.

- Futbolchilarning ro'za tutishiga qanday qaraysiz?

- Bu futbolchining o'ziga bog'liq. Xorijda musulmonlar og'iz ochgach, kechqurun futbol o'ynashadi. Ularda jismoniy holat va energiya yuqori darajada. Men yigitlarga bu borada buyruq bera olmayman. Agarda ro'za tutish futbolchilarga qiyinchilik tug'dirsa, uni o'ylab ko'ramiz.

- "Qo'qon-1912" rahbariyati tomonidan jamoa oldiga aniq vazifa qo'yilganmi?

- Yodingizda bo'lsa, jamoani birinchi davra so'ngida qabul qilib oldim. Etakchilardan ancha ortda edik. O'yinlar davomida tafovutni 1 ochkogacha qisqartirdik. Maqsadimiz - Superligaga yo'l olish, shuningdek, infrastrukturani yaxshilash.

- "Mashal" maydoni bugungi yomg'irli ob-havoga tayyormidi?

- Chempionat boshida hamma maydon bir xil. Mavsum boshida maydonlar yomon holatda bo'lmaydi.

- O'tgan mavsum so'nggi turida "Mashal"ni 4:2 hisobida mag'lub etgansizlar. Bugun esa hisob ochilmadi. Mavsum avvali bo'lgani uchun gol ko'rmadikmi bugun?

- Ha. Bu holat Superliga jamoalarida ham kuzatildi. Dastlabki turlar og'ir o'tadi. Chunki futbolchilardagi jismoniy holat va o'yin amaliyoti etishmasligi seziladi. Vaqti kelib, bu o'rniga tushadi.

Muhsin Nizomiddinov: "Maqsadimiz - Superligaga yo'l olish va infrastrukturani yaxshilash"