Тахаллуси – "аждарлар".

FIFA рейтингида 19-ўрин.

Жаҳон чемпионатига иккинчи марта бормоқда (1958, 2022).

B гуруҳи. Рақиблари: Англия, Эрон, АҚШ.

1–тур, 21 ноябрь. АҚШ — Уэльс

2–тур, 25 ноябрь. Уэльс — Эрон

3–тур, 29 ноябрь. Уэльс — Англия

Муваффақиятлар

Бизда танлаш имконияти йўқ, шу сабаб 1958 йилга кўчиб ўтамиз.

Илк (охиргиси ҳам) мундиаль Уэльс учун кутилмаганда муваффақиятли бўлди.

Уэльсга гуруҳ босқичида венгерлар, мексиканлар ва шведлар рақиблик қилди. Уэльсликлар квартет аутсайдеридек кўринишди – ҳамма Венгрия ва Швецияга ишонч билан қараётган эди.

Уэльсга биринчи турда жаҳоннинг амалдаги вице-чемпиони бўлмиш кучли Венгрия рақиблик қилди. Венгерлар 5-дақиқадаёқ ҳисобни очишди – Йожеф Божик гол муаллифи. Аммо, уэльсликларни тезкор гол синдириб қўймади, жамоа 27-дақиқада Жон Чарльзнинг сай-ҳаракатлари эвазига ҳисобни тенглатирди. Ўйин шундай ҳисоб билан якунланди, 1-1.

Кейинги рақиб – Мексика. Ютиш мумкин бўлган жамоа. Уэльсликлар 32-дақиқада Айвор Оллчерчнинг голи эвазига ҳисобни очди. Аммо, ЖЧ тарихидаги илк ғалабани қўлга киритиш насиб этмади – Бельмонте ўйин якунида ҳисобни тенглаштирди.

Барчасини сўнгги турда гуруҳдаги икки ўйинда ҳам ғалаба қозониб, кейинги босқич масаласини ҳал этиб бўлган шведларга қарши баҳс ҳал қилар эди. Швеция ўша пайтларда жуда кучли эди, шу сабаб Уэльс ўзининг 200% имкониятини ишга солиши керак эди. Учрашув нурсиз дуранг билан якунланди, бу эса плей-оффга чиқиш учун Венгрияга қарши қўшимча ўйинни англатарди. Венгрия сўнгги турда Мексикани мағлуб этиб, умумий 3 очко қўлга киритганди (ўша пайтда ғалаба учун 2 очко бериларди).

Уэльс қўшимча ўйинда яна ғалаба қозонди, ҳатто иродали: Лайош Тихининг ҳисобни очишига уэльсликлар Оллчерч ва Медвиннинг голлари билан жавоб қайтаришди.

Уэльс чорак финалда жаҳондаги шон-шарафли йўлини эндигина бошлаётган бразилияликлар билан тўқнаш келди. Пеле ўйиндаги ягона голни урди. Уэльс эса бошини баланд кўтарган ҳолда уйига кетди.

Мураббий ва ўйин услуби

Роб Пейж – Уэльс терма жамоаси бош мураббийи.

Икки йил Англиянинг иккинчи-учинчи дивизион жамоаларини бошқариб, Роб 2017 йилжа Уэльс ёшлар терма жамоасига чақирилди, уч йил ўтиб эса бош жамоанинг мураббийлар штабига таклиф этилди. Райан Гиггзнинг четлатилишидан сўнг Пейжни вақтинчалик бош мураббий қилишди ва айнан у жамоани Евро-2020га олиб борди.

Гиггзнинг ўз лавозимига қайтиши ва жамоани ЖЧ-2022га тайёрлаши кутилган эди, аммо унинг ҳолати фақат ёмонлашди, шу сабаб Пейж терма жамоани доимий асосда қўлга олди.

Уэльсликлар гуруҳда иккинчи ўрин учун курашда кучли чехларни ортда қолдириб, плей-офф босқичи орқали турнирга йўлланма олди. "Аждарлар" ўтиш ўйинларида Австрия ва Украинадан ўтишди.

Уэльс терма жамоасининг ўйин схемаси: 3-5-2 ёки 5-3-2, кам ҳолларда 3-4-3.

Ўйин услуби – Австралиянинг кучлироқ варианти.

Уэльс – замонавий тенденциялар билан уйғунлашган классик инглиз футболи.

Жамоа югуради ва тепади. Аммо, эски вариант кўпроқ қаттиқ ва контактли ўйинни ўз ичига олса, ҳозирда барчаси ихчам ва замонавий – алдашга ёки бироз комбинация билан ўйнашга уриниш мумкин. Аммо, сўзни қўшиқдан чиқариб ташлай олмайсиз, шу сабаб чексиз тарзда юқоридан паслар ҳеч қаерга кетмаган.

Уэльс – "пружина" жамоа. Улар ҳимояланаётган пайт жуда ҳам ўз дарвозаларига яқин ўрнашиб олишади, аммо тўп рақибдан олинганда жамоанинг ярми ҳужумга ўтиб кетади.

Австрияга қарши ўтиш ўйинида ҳимоячиларнинг иссиқлик хариталарига бир эътибор беринг. Уч ҳимоячидан иккитаси кўпроқ қанотда ўйнайди, бири эса жарима майдончаси ичида "яшайди".

Агар бу Гана футболчиларининг иссиқлик харитаси бўлганида, Аарон Рэмзини марказий ҳимоячи деб ўйлаш мумкин эди.

Яна бир қизиқарли жиҳати – Уэльс ҳужумчиларсиз ўйнайди.

Гарет Бэйл ва Дэниэл Жеймснинг позицияси ҳужум билан алоқадор, аммо бу қатъий амплуа эмас. Икки футболчи ҳам кўп вақтини жамоанинг мудофааланишига ёрдам берган ҳолда майдон марказида ўтказади, доимий позицияни эса Уэльсдан жуда ҳам кам бўлган позицион ҳужумлар пайтидагина эгаллашади.

Терма жамоа етакчилари

Гарет Бэйл – Уэльс. Гольф. Аммо, энди Мадрид эмас.

Бэйл ҳали ҳам терма жамоа етакчиси. Унинг ҳурматини жойига қўйиш керак – у миллий жамоа учун бор 146%ини берган.

106та ўйин. 40та гол. Сардорлик боғичи.

Уэльс тарихидаги энг яхши тўпурар.

33 ёшли Бэйл тезлигини йўқотганга ўхшайди, аммо тажриба ва "аждарҳо" либосида ўзини кўрсатиш истаги Гаретга иккинчи ёшликни бахш этгандек. Акс ҳолда, клуб даражасидаги ўртача иштирокини Уэльсдаги ақлбоварқилмас ўйини билан тушунтириш қийин.

Буюк Британияда Бэйлни ягона жаҳон даражасидаги британиялик футболчи деб ҳисоблашади.

Қўшиламиз.

Бен Дэвис – универсал ҳимоячи.

"Тоттенхэм"дек жамоада 8 йил кўп нарсадан далолат беради.

Бек ҳам чап, ҳам мудофаа марказида ўйнай олади, бу Уэльснинг кўплаб мудофаавий ўйин қурилишларида муҳимдир.

Дэвис фидойилиги ва жанговар руҳи сабаб жамоанинг тимсолларидан бирига айланди. Терма жамоадаги 73та ўйин эса буни яққол кўрсатиб турибди.

Бреннан Жонсон – уэльс футболидаги ноёб истеъдод.

21 ёшли ҳужумчи тезлик билан ривожланмоқда. Ўтган мавсум Чемпионшипда гол+пас тизимида 28 очко жамғарган ҳолда шов-шув бўлган ўйинчи ҳозирда АПЛдаги илк голларини урмоқда.

Уэльсликлар Жонсонни Гарет Бэйлнинг ўринбосари сифатида кўришаётганини яширишмаяпти. Хўш, ёш ҳужумчига бўлган диққат жуда ҳам юқори.

Жонсон ҳужумчи ортидаги позицияда ажойиб кўринади. Унда юқори ўйин интеллекти ва майдонни яхши кўра олиш қобилияти бор.

Кучли ва заиф томонлари

Кучли томонлари: ҳаводаги кураш, якка курашлар, стандарт вазиятлар.

Заиф томонлари: мудофаадаги хатолар, позицион ҳужумлар, оддий услуб.

Уэльс қаттиқ футбол ўйнайди. Ўйинчилар тўқнашувлардан қўрқишмайди, доим охиригача югуришади ва вазиятларни охирига етказиб қўйишади.

Иккинчи қаватдаги ўйин – Уэльснинг устун томонларидан. Уэльсликлар тактик жиҳатдан яхши тайёрланишган. Статистика ҳам Уэльс ҳаводаги кураш ҳақида гап кетганида кучли жамоалардан бири эканлигини кўрсатади. Юқорида ютилган дуэллар кўрсаткичи – 56%. Бу жуда кўп.

Стандарт вазиятлар ҳаводаги курашда устунлик билан боғлиқ. Уэльс ўйинчилари юқоридан ажойиб пас беришади, агар тўп рақибга тушса, Уэльсда жарима майдончаси ёнида бутун гвардия турган бўлади ва улар қарши ҳужум хавфини камайтиришга ҳаракат қилишади.

Қанот ҳимоячилари доим олдинга чиқиб кетгани сабаб жамоанинг мудофаасида муаммолар рўй беради. Барча қарши ҳужумлар ҳам идеал бўлмайди, рақиб тўпни эгаллаб олганда, кўп сонли ўйинчилар бир-биридан катта фарқ билан турган уч ҳимоячига эга Уэльс мудофаасини қийнашади.

Позицион ҳужумлар – барча мудофаавий жамоаларнинг заиф жойи. Уэльс ҳам истисно эмас, ҳатто энг ёмон намуналардан бири. Барчаси уэльсликларга етишмайдиган креатив ўйинчиларга боғлиқ. Олдин бу талабни тўлиқ қопламаган бўлса ҳам Аарон Рэмзининг энг яхши йиллари ҳозирда ортда. Ҳозирги жамоадаги кўп футболчилар яратишга эмас, бузишга кўниккан.

Оддий услубнинг салбий жиҳати камчилигида эмас, олдиндан нима бўлиши маълум бўлганида. Барча Уэльс қандай ўйнашини яхши билади. Уларда ўзларининг даражасидаги рақибларга қарши яхши имконият бор, аммо топ жамоалар билан ўйинларда муаммолар кафолатланган.

Тахминий таркиб:

Жо Алленнинг ўрнида Крис Мифем бўлиши мумкин: бундай ҳолатда Мифем Итан Ампаду билан жой алмашади. Бу ҳимоявийроқ вариант бўлади.

Агар Бэйл ёки Жеймс турнирдаги энг яхши формада келмаса, Бреннан Жонсоннинг ҳам асосий таркибда бўлиши истисно эмас.

Алишер Остонов таржимаси

Мундиаль 2022. Уэльс!