Xulen Lopetegi – "Real Madrid"

Ispaniyalik mutaxassis 2018/2019 yilgi mavsumga qadar bir necha yil Ispaniya terma jamoasini boshqargan. Ushbu boshqaruv davomida murabbiy "qizil furiya"ning eng yaxshi murabbiylari qatoriga o'z nomini qo'shib qo'yish arafasida edi, chunki Ispaniya bilan ketma ket 20 o'yinlik mag'lubiyatsiz seriya qayd etgandi.

2018 yilgi Jahon chempionati arafasida Madridning "Real" klubi mutaxassisga "qaymoqranglilar" murabbiyi bo'lish taklifini bergach, u bunga rozilik bildiradi. Biroq bu xato yo'l edi. Avvalo, Jahon chempionati arafasida terma jamoani tashlab ketish – eng nomaqbul ishlardan biri. Chunki yangi murabbiy jamoa bilan til topishib ketishiga vaqt kam qolgandi.

Shundan keyin butun futbol ommasi, jumladan, Ispaniya hukumati ham Lopetegining bu qilmishini qoralab chiqdi. Xulen "Real"da deyarli hech nima qila olmadi. Atigi 14 o'yin o'tkazdi (6 g'alaba, 6 mag'lubiyat hamda 2 durang) va "Barselona"ga qarshi yirik hisobdagi mag'lubiyatdan so'ng ishdan bo'shatildi.

Ronald Kuman – "Barselona"

Niderlandiyalik sobiq futbolchi, tirik afsona – Ronald Kuman Kataloniya klubini qabul qilib olishdan avval o'z yurti terma jamoasiga ustozlik qilib, yaxshi natijalar ko'rsatayotgandi. Niderlandiya termasi uning murabbiyligi ostida Evropaning grand jamoalari sifatida ko'rila boshlagan edi.

"Barselona" Kuman bilan aloqaga chiqib, uni klubga taklif qildi. 2020 yilda kataloniyaliklar "uzoq kutgan" Ronald Kuman "ko'k-anorranglilar" murabbiyi sifatida ish boshladi. Yoshlarga ko'proq ahamiyat qaratishni niyat qilgan mutaxassisning "Barsa" uchun yagona qilgan yaxshiligi Pedri, Puch, Fati kabi bo'lajak yulduzlari kashf qilgani bo'ldi. Murabbiyning "Barsa"dagi umumiy natijasi – 67 o'yin, 39 g'alaba, 16 mag'lubiyat hamda 12 durang. Uning so'nggi o'yini "Rayo Valekano"ga qarshi uchrashuvdagi mag'lubiyat bo'ldi.

Devid Moyes – "Manchester Yunayted"

Manchester jamoasining bir mavsumlik, eng omadsiz murabbiyi deb hisoblanadigan Devid Moyes, shaxsan klub afsonasi ser Aleks Fergyuson tomonidan taklif qilingandi. "Everton"da yaxshi natijalar qayd etgan mutaxassis "qizil iblislar" safidagi bir yil ichida keyingi taqdirini hal qilib ketdi.

Jamoa uning qo'l ostida 51 o'yin o'tkazib, 27 g'alaba, 15 mag'lubiyat hamda 9 durang qayd etdi. Devid Moyes 2014 yilning aprelida ishdan chetlashtirildi. "Manchester Yunayted" esa mavsumni 7-o'rin bilan yakunladi. Fergyusondan keyingi bu sho'ng'ish Moyesning darajasini o'rtamiyonadan ham pastlatib yubordi.

Marchello Lippi – Italiya terma jamoasi

Italiyalik murabbiy Marchello Lippi vatani termasi bilan 2006 yilda Jahon chempioniga aylangan. 1982 yildan keyingi Jahon chempionligini Apennin yarimoroliga qaytargan murabbiyga 2010 yil Janubiy Afrikada o'tkazilgan Jahon chempionatida qatnashuvchi jamoa ishonib topshiriladi. Ammo shu yili ideal tarkibdagi terma Paragvay, Slovakiya hamda Yangi Zellandiya mavjud bo'lgan guruhda birorta o'yinda g'alabaga erisha olmaydi hamda so'nggi o'rinni egallaydi.

Shundan so'ng Lippi o'z ixtiyori bilan Italiya murabbiyligini tark etadi.

Shuhrat Homidov tayyorladi

Murabbiylar yo'l qo'ygan katta xatolar (TOP-4)