“Neftchi” klubi raisi o'z navbatida muxlislarning rayini qaytarmadi-da, Ismoilovni chaqirtirdi. Garchi mashg'ulot jarayoni davom etayotgan bo'lishiga Murod Muzaffarovich tribunada o'tirgan ashaddiy ishqibozlarni savollariga javob berish uchun keldi. Ochig'ini aytganda, ushbu taqdimot marosimi norasmiy muloqotdek o'tib ketdi. Muxlislar keyin futbolchilarni ham kelishlarini so'rab, murabbiyga murojaat qilishdi. Maydonda “Lokomotiv” bilan o'yinga astoydil tayyorgarlik ko'rayotgan futbolchilarni chalg'itmaslik uchun Ismoilov muxlislarga to'g'ri tushunishlarini so'radi va baribir ishqibozlar qatiy turib olganidan so'ng, Jahongir Mehmonov bilan Mansur Saidov ham muxlislar qarshisida paydo bo'ldi. Quyida esa “Neftchi” ustozining bildirib o'tgan fikrlarini o'qishingiz mumkin.

- Davralar oralig'ida tarkibimizda yuz bergan o'zgarishlar haqida batafsil hozir aytmasam ham sizlarga yaxshi malum. Buni matbuotda ommaviy axborot vositalari etarlicha yoritdi.

- Murod aka, “Sho'rtan”dan yirik hisobda uchralgan mag'lubiyatni qanday izohlaysiz?
- G'uzorga borgan ishqibozlarimizdan so'rashingiz ham mumkin, shu kuni butun jamoani o'yini chiqmadi. Bungacha zo'r o'ynab turgan futbolchilarning shu kuni negadir o'yini qovushmadi. O'yin video tasmasini qaytadan ko'rib chiqib, tahlil qilamiz va yo'l qo'yilgan xatolarni bartaraf etish uchun ishlaymiz. Bahsdan so'ng kiyin xonasida yigitlarga aytgan gapim shu bo'ldiki: har biringlar diskni olib, ko'rib chiqinglar, kim nimaga qodir-ku, shu kuni nima qildi? Qolgani o'zinglarni vijdoninglarga havola dedim. To'g'risi, navbatdagi raqibimiz “Lokomotiv” bo'lgani uchun ham futbolchilarimga ortiqcha bosim qilib, jiddiy tanbeh berishni lozim topmadik. Futbolda yutuqlar bilan mag'lubiyatlar ham doimo yonma-yon yuradi. Faqat undan to'g'ris xulosa chiqarib olish muhim.

- “Lokomotiv” bilan o'yin ko'p narsani hal qiladi?
- Hal qiladi deganda, nimani nazarda tutdingiz?

- Agar g'alaba qozonsak, medallar uchun kurashda imkoniyatni saqlab qolamiz. Aks xolda...
- Ha. Ko'ryapsizlar mashg'ulotda har bir futbolchi astoydil ishlamoqda. Barchamizni maqsadimiz shu kuni g'alaba qozonib, rahbariyat va muxlislarni oldida yuzimiz yorug' bo'lishi kerak. Buni uddalasa bo'ladi.

- O'zi “Neftchi”ni bu yil 3-o'rinni olish imkoniyatini qanday baholaysiz?
- Oldin ham aytganman, men ishqibozlarga hech nima vada bermayman. Balki chempion bo'larmiz. Aksincha 4-5-o'rinni olarmiz. Buni Yaratgan biladi xolos. Hozir sizlarga chempion bo'lamiz desam, rejalarimiz amalga oshmay qolsa bo'lmaydi. Shuning uchun kelinglar yaxshi niyat qilaylik va imkon qadar yuqori o'rinni band etish uchun astoydil ishlaylik. Qolganini vaqt ko'rsatadi.

- Jahongir Mehmonov nega “Sho'rtan”ni bilan o'yinni o'tkazib yubordi?
- Mehmonovning safdan chiqishi kutilmaganda yuz berdi. Uni G'uzorga olib ham ketgandik. Faqat o'yinoldi mashg'ulotda to'satdan oyog'idan jaroxat olib qoldi. Bu esa tashvishimizni oshirdi. Albatta Jahongirning yo'qligi ham salbiy tasirini o'tkazmasdan qolmadi.

- Aybek Nurboevni nima uchun olib qolmadinglar? Hozir u juda kerak edi?
- Aybek Nurboev juda yaxshi futbolchi. Uning mahoratiga shubha bo'lishi mumkinmas. Lekin bilasizmi birinch davrada jamoamizda yuzaga kelgan raqobatda u yuta olmadi. Ko'pincha zaxirada qolib ketdi. Shu bois davralar oralig'ida Aybek oldimga kelib, ko'proq o'yin amaliyotga ega bo'lishini xohlayotganini aytdi. Shunda biz uni “Qo'qon-1912” jamoasiga ijara asosida berdik. Mavsum yakuniga etgach, Nurboevni yana safga qaytaramiz. Lekin oldindan bir nimani bilib bo'lmaganidek, Mehmonovni ham safdan chiqishini kim o'ylabdi deysiz.

- Ko'p o'yinlarda yigitlar bitta gol urib olganidan keyin o'yinni susaytirib yuboryapti. Jamoada ruhshunos bormi?
- Yo'q. Hozirgacha murabbiylar shtabidagi yordamchilarim bilan bu borada ham ishlab kelyapmiz. Balki bunga juda extiyoj sezadigan bo'lsak, rahbariyat bilan maslahatlashgan xolda ruhshunos ham jalb etarmiz. Ammo keladigan o'sha ruhshunosni ham jamoaga foydasi tegadigan bo'lishi shart deb o'ylayman. Shundagina biz bilan ishlasa bo'ladi.

Islombek Rustambekov yozib oldi.

Murod Ismoilov: “Muxlislarga hech nima vada bermayman”