Bu yo'lda Qosimov tabiri bilan aytganda o'tkinchi uchrashuvning o'zi yo'q. Ochko kerak bo'lmaydigan yoki shunchaki o'yin o'tkazadigan vaqt emas. Demak otni qamchilash kerak. Xususan turnir jadvali o'rtasida yonma-yon ketayotgan "Andijon" o'z maydonida "Surxon"ni qabul qilsa, "Metallurg" kuchli raqib "Navbahor"ni mehmon qiladi. Mazkur uchrashuvlar oldidan tajribali mutaxassis va sobiq futbolchi Abdumajit Toirovning fikrlari bilan qiziqdik.

"Andijon" - "Surxon"

- Ikki jamoa deyarli bir xil uslubda harakat qiladi. Tarkib darajasi ham teng. "Andijon"ga Sardor Azimovning yo'qligi muammo tug'dirishi mumkin. Lekin so'nggi uchrashuvda Muhammadkarim Toirov ancha yaxshi harakat qildi. "Surxon"da esa tarkibda muammo yo'q. Murabbiylar qanday taktika tanlashiga ko'p narsa bog'liq. Ustunlik "Andijon" tarafida bo'ladi. "Bobur Arena" bunga majbur qila oladi. "Surxon" shu bosimga chidasa, ijobiy natijaga erishishi mumkin. "Surxon" ikkinchi raqam bo'lib harakat qiladi va qarshi hujumdan foydalanadi, deb o'ylayman. "Andijon"ning jarima zarbalari xavfli chiqadi.

"Metallurg" - "Navbahor"

- "Navbahor" juda kuchli o'yin ko'rsatmoqda. Ayrim holatlarda g'alaba uchun minimal kuch sarflab o'ynayotganday tuyuladi. Shuning uchun hisob katta bo'lmaydi. "Metallurg"da esa vaziyat og'ir, himoyada muammolar ko'pligini "Neftchi" bilan o'yin ko'rsatib berdi. Zabihillo O'rinboev hujum qilish o'rniga orqaga qaytib himoyada yordam berishga majbur. Abdumannonovning o'yinida esa pasayish bor. Bekobodda "Navbahor" favorit. Ular ortga g'alaba bilan qaytadi, deya olaman.

Mutaxassis fikri - "Andijon" bunday muhitda hujum qilishga majbur, "Metallurg" himoyasida muammolar va vazifasi o'zgarayotgan O'rinboev