Shomurodov Istanbulda Chag'dash Atan bilan birga ishlaydi. Chag'dash Atan 2023 yildan buyon "Istanbul Bashakshehir"ni boshqarib kelmoqda. Shomurodov faoliyati davomida bir qancha mashhur va taniqli murabbiylar bilan birga ishlagan. Quyida shu haqida batafsil malumot berishga harakat qilamiz.

Aleksandr Xomyakov ("Mashal" 2013-2014)

"Mashal" tarbiyalanuvchisi hisoblangan Shomurodov katta futboldagi ilk qadamlarini 2013-2014 yillarda Aleksandr Xomyakov boshchiligida tashlagan. Hujumchi muborakliklar tarkibida Superligada 9 ta o'yinda maydonga tushgan. 2014 yil yakunlangach u Toshkentga "Bunyodkor"ga yo'l olgan. Uni yangi jamoasida yangi sarguzashtlar kutayotgandi.

Sergey Lushchan, Baxtiyor Boboev ("Bunyodkor" 2015-2017)

"Bunyodkor"da yoshartirish siyosatini boshlagan Sergey Lushchan Doston Hamdamov, Akromjon Komilov, Zabihillo O'rinboevlarning yoniga 2015 yil "Mashal"dan Eldor Shomurodov va Otabek Shukurovni jalb qildi. Bu orqali oldingi chiziqda Hamdamov, Shomurodov, O'rinboev triosi hosil qilindi va bu 2016 yilgi mavsumda o'z samarasini berdi. 2015 yil qisqa vaqt Baxtiyor Boboev bosh murabbiy bo'lganini hisobga olmaganda u Lushchan bilan ko'proq ishladi. Maqolamiz qahramoni "qaldirg'ochlar" tarkibidagi debyut mavsumida 25 ta uchrashuvda 7 ta gol urgan bo'lsa, 2016 yil bu ko'rsatkich yana oshdi, 27 ta o'yinda 10 ta gol bilan jamoasining eng yaxshi to'purarlaridan biri bo'ldi. Shu yili mavsumni ikkinchi o'rinda yakunladi. 2015 yil "Bunyodkor"dagi yorqin o'yinlari orqali milliy terma jamoadan chaqiruv olgandi. Aynan Lushchan qo'l ostida u yangi darajaga chiqdi desak mubolag'a bo'lmasa kerak.

Mirjalol Qosimov ("Bunyodkor" 2017)

2017 yil "Bunyodkor" uchun yaxshi boshlanmadi. Ketma-ket muvaffaqiyatsizliklar, mag'lubiyatlar natijasida birinchi davraning o'rtasida Sergey Lushchanga chiqish eshiklari ko'rsatildi. Murabbiylik postiga tayinlangan Mirjalol Qosimov boshchiligida Eldor 6 ta uchrashuvda maydonga tushdi va 1 ta gol urdi. Bu davrga kelib uning o'yinida pasayish kuzatilayotgan, legionerga aylanish masalalari atrofni kezib yurgandi. Toshkent klubidagi faoliyati shu orqali yakuniga etdi.

Leonid Kuchuk, Dmitriy Kirichenko ("Rostov" 2017)

Faoliyatida ilk bor legionerga aylangan Shomurodov uchun "Rostov" o'z eshiklarini ochdi. Bu vaqtda jamoani belaruslik murabbiy Leonid Kuchuk boshqarayotgandi. Ochig'ini aytish kerakki, Eldorning "Rostov"dagi ilk mavsumi moslashish uchun ketdi. Murabbiy unga sekin-asta imkoniyat berishni boshladi. Kuchuk qo'l ostida jami 13 ta bahsda maydonga tushdi, Rossiya chempionatida debyut qildi. Bu vaqtda qisqa muddat Dmitriy Kirichenko ham jamoani boshqardi.

Valeriy Karpin ("Rostov" 2017-2020)

Moslashish jarayonini boshidan o'tkazgan hujumchi Valeriy Karpin ustozligida "Rostov"dagi gollari sonini ochdi. Karpin bilan ishlash orqali u yaxshi o'sishga erishdi deya olamiz. Bu jamoa tarkibida Karpin murabbiyligida 77 ta o'yinda qatnashdi va ancha sermahsullik ko'rsatdi, 18 ta gol, 12 ta assist qayd etdi. Murabbiy va futbolchi o'rtasidagi iliq munosabatlar bor. Aynan "Rostov" unga Evropaga yo'l olishida katta trampolin bo'la oldi va bunda Valeriy Georgievichning hissasi katta bo'ldi.

Rolando Maran, Davide Ballardini ("Jenoa" 2020-2021)

Hamyurtimizning Italiyaga yo'l olishi o'zbek futbolida ulkan voqelik sifatida qabul qilindi. A Seriyada Shomurodov uchun debocha vazifasini "Jenoa" jamoasi o'tadi. U Appenin yarim oroliga kelganida genuyaliklarni Rolando Maran bosh murabbiy sifatida maydonga boshlab tushayotgandi. To'p tepar Maran davrida faoliyatida ilk bor Italiya chempionatida debyutini va ilk golini nishonladi. Maranning istefosidan so'ng "Jenoa" ruli Davide Ballardiniga o'tdi. U ustozlik qilgan mavsumda Shomurodov Italiyada yanada yorqin o'yin ko'rsatishni boshladi, 23 ta o'yin 7 ta gol, 1 ta assist.

Joze Mourino ("Roma" 2021-2023)

Cho'qqini ko'zlasang toqqa albatta etasan deganlaridek Eldor "Jenoa"dan so'ng Italiyaning top klubi "Roma"ga o'tdi. Rimliklarda Joze Mourino faoliyat olib borayotgan, u bilan ishlash esa har qanday futbolchi uchun oson emasdi. Shomurodov katta bosim va yulduzlarga to'la "Roma" safida 48 ta bahsda qatnashdi va 6 ta gol urdi, yana 6 ta golga assistentlik qildi. Jamoa bilan UEFA Evropa ligasi finaligacha etib borgan bo'lsa, Konferenciyalar ligasida g'olib chiqdi.

Fabrico Lorieri, Luka Gotti, Leonardo Semplichi ("Speciya" 2023)

"Roma"da zaxirada qolishni boshlagan Eldor uchun o'yin amaliyoti zarur edi. Bunda u "Speciya"ga ijaraga berildi. Ushbu klubdagi qisqa faoliyati davomida Fabrico Lorieri, Luka Gotti, Leonardo Semplichi kabi mutaxassislar bilan ishladi. Semplichi unga 13 ta uchrashuvda imkoniyat berdi va u 1 ta gol urdi.

De Rossi, Ivan Yurich ("Roma" 2024)

O'tgan mavsum boshida rimliklar boshqaruviga sobiq futbolchi De Rossi keldi. Lekin klubdagi faoliyati uzoqqa cho'zilmadi, natijalar muvaffaqiyatsiz ko'rinish oldi. Shomurodov uning qo'l ostida 3 ta o'yinda maydonga tushdi va 1 ta gol urdi. De Rossidan so'ng jamoani bir nechta o'yinda xorvatiyalik Ivan Yurich ham boshqardi. Yurich bilan ham 3 ta uchrashuv o'tkazdi.

Klaudio Raneri ("Kalyari" 2023-2024,"Roma" 2024-2025)

Qahramonimiz shu vaqtgacha ishlagan yana bir mashhur mutaxassislardan biri Raneri hisoblanadi. "Lester" ertagini yozgan murabbiy Shomurodovga to'liq imkoniyat berdi deya olamiz. O'zbekistonlik hujumchi bu klub tarkibida 24 ta bellashuvda 3 ta gol, 3 ta assist muallifiga aylandi. "Kalyari"dagi o'zaro yaxshi tushunish Rimda ham davom etdi. Ustoz-shogirdning bu safargi o'zaro tushunishlari ham samarali chiqdi deya olamiz.

O'zbekiston terma jamoasida

Samvel Babayan (2015-2017)

Yuqorida aytganimizdek Eldor milliy terma jamoada 2015 yil debyut qilgan va u Samvel Babayan davriga to'g'ri kelgan. Ilk golini esa JCH-2018 saralashi doirasida Bahraynga urgan.

Timur Kapadze (2018, 2025)

Murabbiylik faoliyatini boshlagan va milliy terma jamoada qisqa vaqt mehnat qilgan Timur Kapadze uni Marokash va Senegalga qarshi o'rtoqlik uchrashuvlariga jalb qilgan edi. Keyinchalik JCH-2026 saralash uchrashuvlarida ham maydonga tushdi.

Ektor Kuper (2018-2019)

2019 yil BAAdagi Osiyo kubogida Kuper Shomurodovdan hujumchi sifatida foydalangandi. Qolaversa, u o'yin uslubi, texnikasi jihatdan argentinalik qurayotgan jamoaga mos kelardi. Unga oldingi chiziqda raqibdan qochadigan, kam vaziyatlardan foydalanadigan ijrochi kerak edi. Vaholanki, Osiyo kubogi qaydnomasida birgina hujumchi Marat Bikmaev bor edi, xolos. O'mon bilan uchrashuvda zaxiradan maydonga tashlangan Eldor g'alaba golini urgandi. U guruh bosqichida Turkmaniston, Yaponiya darvozalarini ishg'ol qilgan.

Vadim Abramov (2019-2021)

Kuperdan so'ng terma jamoa Abramovga ishonib topshirildi. Lekin uning boshchiligida JCH-2022 saralash bosqichida "oq bo'rilar" muvaffaqiyatsizlikka yuz tutdi. Eldor Shomurodov odatdagidek Abramov jamoasida ham asosiy hujumchi bo'ldi.

Srechko Katanec (2021-2025)

Srechko Katanec jamoasi aynan Shomurodov atrofida qurilgan bo'lib, uningsiz qanday bo'lishini Qatardagi Osiyo kubogi ko'rsatib berdi. U muhim figura va oldingi chiziqdagi yagona yulduz. Forvard Katanec davrida ketma-ket gollar urishi natijasida O'zbekiston terma jamoasi tarixidagi eng yaxshi to'purar bo'lib oldi.

Mutolaa uchun. Raneri, Mourino, Karpin. Shomurodov endi turkiyalik murabbiy bilan ishlaydi. Avvalgi mutaxassislar bilan qanday sarguzashtlar bo'lgan?