Яқинда таниш мухлислардан бири шундай фикр билдирди ва унинг фикри бошқотиришимизга сабаб бўлди. У шундай деди:

"Ўзбекистонга чет эллик мураббийлар қанча кўп келса, шунча яхши. Чунки шу орқали ўзбек футболига ранг-баранглик кириб келади. Фарқи йўқ, мураббий европалик бўладими, осиёликми ёки Жанубий америкаликми - энг муҳими барибир нимадир янгилик олиб киради".

"Лекин муаммо шундаки, бизга келадиган чет эллик мураббийлар тез дангаса бўлиб қолишади. Негаки бизнинг раҳбарлар уларга талаб қўйишни билмайди. Талаб деганда фақат ютиш эмас, масалан мураббий олдига 2-3 йиллик режалар, жамоанинг кейинги тақдири қандай бўлиши ва келажакда қандай ўйин намойиш этиши, хуллас шу каби вазифалар".

"Айтайлик, Шота Арвеладзе келди, чемпион бўлди, Кубокни ютди, кейин-чи? Ўзидан нимадир қолдириб кетдими? Клуб структураси ривожига қандай ҳисса қўшди? Ёки бўлмаса олдин ишлаб кетган Сколари, Зико борасида ҳам шу саволларни берса бўлади. Бизнинг раҳбарлар талаб қилишни билмагани учун энг зўр мураббий ҳам Ўзбекистонга келиб дангаса бўлиб қолади. Ҳатто Сречко Катанец билан ҳам шу ҳолат рўй бериши мумкин".

Чиндан ҳам бу каби фикрлар кишини ўйлашга ундайди. Хўш, Сиз қандай фикрдасиз? Ростан ҳам бизга келиб ишлайдиган хорижлик мураббийлар дангаса бўлиб қоладими? Уларни футболимиздаги ички муҳит шунга ўргатиб қўядими? Наҳотки мураббийни олиб келган раҳбарлар талаб қилишни билмаса?

Мухлис фикри: "Хорижлик мураббийлар тез дангаса бўлиб қолади"