Malumot uchun, "Flitvud Taun" Angliya birinchi divizionida ishtirok etadi va hozir 24 jamoa orasida 15-o'rinda bormoqda. Kuni kecha mazkur klub rasmiy sayti o'zbekistonlik ikki futbolchining jamoa mashg'ulotlariga kelib qo'shilganini malum qildi.

"Flitvud Taun" saytining yozishicha, "Loko" tarbiyalanuvchilari u erda Berri Nikolson qo'l ostida mashg'ulot olib borishadi. "Lokomotiv" professional futbol klubi va "Flitvud Taun" o'rtasida hamkorlik shu yilning aprel oyida boshlangan bo'lib, yozda klub vakillari Stiv Kurvud hamda Gretar Steynsson Toshkentga tashrif buyurishgandi.

Ular "Lokomotiv" ishtirokidagi o'rtoqlik uchrashuvini kuzatib, futbolchilar orasidan ikki nafarini tanlab olishgandi. "Biz "Lokomotiv" (Toshkent) bilan hamkorlik qilishdan mamnunmiz, negaki Osiyo futbol bozoriga kirib borish asosiy maqsadlarimizdan biri hisoblanadi va bu ishni "Lokomotiv" orqali amalga oshirmoqchimiz. Biz o'zaro hamkorlik borasida endi dastlabki qadamlarni tashladik. Hali rejalarimiz ulkan", - deydi "Flitvud Taun" direktori Stiv Kurvud.

"Lokomotiv" O'zbekistondagi eng kuchli klublardan biri hisoblanadi. Ularda bolalar bilan ishlash yaxshi yo'lga qo'yilgan. Proxorov bilan Nartajiev ham iqtidorlardan yoshlardan", - deydi Stiv Kurvud futbolchilar haqida fikr bildirayotib.

Albatta, FIFA reglamentiga muvofiq futbolchilarimiz Angliya birinchi divizioni bahslarida ishtirok eta olishmaydi. Ammo mashg'ulot va o'rtoqlik o'yinlarida qatnashib etarlicha malaka oshirish, shuningdek ingliz madaniyati bilan yaqindan tanishish imkoniyati yuzaga keladi. Futbolchilarimiz Blekpulda klub tomonidan ajratilgan mehmonxonada istiqomat qilishadi.

Nartajiev va Proxorov Angliyadagi faoliyatni boshlashdi