Qarshining "Nasaf" klubi uzoq kutilgan titulga ega chiqdi. Ro'ziqul Berdiev shogirdlari bir necha yildan buyon chempionlik uchun muntazib kurashib kelayotgandi, biroq mavsum so'ngida jamoaga nimadir etishmasdi. Joriy mavsum esa Qashqadaryo klubi muddatidan ilgari chempionlikni tantana qildi. Keling, "qizillar"ning chempionlik sari yurishida nimalar sabab bo'lganini ko'rib chiqamiz.

Chempionlik ishtiyoqi

So'nggi yillarda "Nasaf" katta ishtiyoq bilan chempionlik sari talpinayotgandi. Biroq keraksiz o'yinlarda ochko yo'qotishlar jamoaning oyog'idan tortib qolayotgandi. Amaldagi chempion "Paxtakor"ni bir qancha yetakchilar tark etgani ham chempionat avvalidayoq kurash qizg'in kechishini belgilab bergandi. Mavsum avvalida "Nasaf" oldiga chempionlik vazifasi qo'yildi. Bu haqda klub bosh murabbiyi Ro'ziqul Berdiev o'z intervyularida ko'p marotaba takrorladi. Bu ishtiyoq mavsum boshidanoq ko'zga tashlandi.

Asosiy tarkib o'zagining bir necha yildan beri shakllanib kelayotgani

"Nasaf" tarkibining katta qismi klub akademiyasi tarbiyalanuvchilari ekanligidan ko'pchilikning xabari bo'lsa kerak. Shu jumladan, bosh murabbiyi va asosiy tarkib o'zagi bir necha yildan saqlanib va shakllanib kelayotgani futbolchilarning bir-birini tushunib harakat qilishi va yo'qotishlar o'rnini boshqalar bilan to'ldirilishiga zamin hozirladi. Masalan, munatazam maydonga tushadigan G'aybullaev – 2017, Ne'matov, Nasrullaev, Mozgovoy, Bozorov - 2018, Stanoevich - 2020, Davronov 2021 yildan beri klub tarkibidan o'rin olgan. Qolaversa, jamoaga kelganiga ko'p bo'lmagan hujumchi Zoran Marushich asta-sekin jamoaga moslashdi va muhim o'yinlarda o'z gollari bilan foyda keltirdi.

Chempionlik uchun boshqa davogarlar, masalan, "Navbahor" va "Neftchi" jamoalari o'z tarkibida bir nechta yulduz futbolchilar bilan kuchaytirib oldi, biroq ularning barchasi ham jamoaga kutilganidek moslashib keta olmadi.

Qurbonlik

"Nasaf" deyarli har yili uchta musobaqada g'oliblik uchun kurash olib borardi, shu sabab mavsum so'ngida futbolchilarda charchoq alomatlari yuzaga kelib, bu natijalarga ham o'z ta’sirini o'tkazardi. Joriy mavsum esa, o'ylashimcha, "Nasaf" Superligadan boshqa musobaqalardan "voz kechdi" va asosiy e'tiborini chempionatga qaratdi. So'nggi yillarda O'zbekiston kubogini o'ziniki qilayotgan qarshiliklar joriy yil guruh bosqichidayoq musobaqa bilan xayrlashib qo'yaqoldi. Shu bilan birga, Osiyo Chempionlar ligasining ikkinchi darajali musobaqasi ham "ajdarlar" uchun ustuvor vazifa emasdek tuyuldi. Yodingizda bo'lsa, klub dastlabki ikki turda 4 ochko jamg'argandi va 3-turdagi g'alaba ularga keyingi bosqich uchun katta imkoniyat taqdim etardi. Biroq o'sha pallada chempionlik uchun kurash avjida bo'lgani sababli Ro'ziqul Berdiev Marushich, Siddiqov kabi yetakchilarga chempionat doirasidagi muhim qarama-qarshiliklar oldididan dam berib, ularni qaydnomaga ham kiritmadi. Shuningdek, Golban, Rahmatov va Jigaurilarni ham zaxirada qoldirib, ehtiyoj tufayli maydonga tushirdi. Charchoq alomatlarin klubning hozirgi o'yinlarida ham ko'zga tashlanmoqda, damoa yo ochko yo'qotmoqda yoki o'ta qiyinchilik bilan g'alaba qozonmoqda, biroq chempionlik masalasi ijobiy hal etib bo'lingani jamoaning katta yutug'i sanaladi. Chempionlik masalasi hal bo'lgandan keyin, endi qarshiliklar bor e'tiborini qita turniriga qaratsa, ajabmas.

Peshqadamlarga qarshi ijobiy natijalar

"So'g'diyona"ga qarshi noxush natijalarni inobatga olmaganda ("Nasaf" ikkala o'yinda ham mag'lub bo'ldi), Qashqadaryo jamoasi yetakchilarning o'zaro qarama-qarshiligida eng ko'p ochko jamlay oldi. OKMK va "Navbahor" ikki bellashuvda ham mag'lub etildi, "Paxtakor"dan 4 ochko qo'lga kiritildi, keyingi turdagi raqib "Neftchi" birinchi davrada mag'lub etildi. TOP-6 jamoalariga qarshi bellashuvlarda "Nasaf" 19 ochko jamg'ardi.

Taqibchilarning yordami

Yuqorida takidlaganimdek, TOP-6 o'rtasidagi qarama-qarshiliklarda eng ko'p ochkoni "Nasaf" qo'lga kiritgan. Qolgan jamoalar esa o'zaro to'qnashuvlarda ko'p ochko yo'qotgan, bu ham "Nasaf" foydasiga ishladi. Hatto ularni ikki bahsda ham taslim etgan "So'g'diyona" oltilikda jamoalarga qarshi bellashuvlarda 13 ochko jamg'arishga erishdi. Undan keyin "Navbahor"da bu ko'rsatkich yaxshiroq - 12 ochko. Turnir jadvalida ikkinchi o'rinda borayotgan OKMK "Neftchi" singari bor-yo'g'i 11 ochko ishlagan. Qolaversa, olmaliqliklarni yetakchilardan atigi 9 ochko tortib olgan "Paxtakor"ga qarshi o'yin kutib turibdi.

Chiroyli o'yindan natijaning muhimligi va muvozanat

"Nasaf"ning joriy mavsumdagi o'yinlarida rang-baranglik kamroq ko'zga tashlandi. Klub ko'pgina o'yinlarda natija uchun o'ynagani aks etdi. Bu muxlislar va teletomoshabinlar tabini biroz xira qilgan bo'lsa-da, natijaga erishilida asqotdi. Shuningdek, qarshiliklar mezbon va safar o'yinlarda ham maksimal ochko qo'lga kiriitishga intildi va ikki tomonda ochko ishlash borasida ham eng yuqori pog'onani egalladi. Shu jumladan o'z maydonida 27 ochko jamg'argan Berdiev shogirdlari safarda 25 ochko to'pladi. Boshqa taqibchilarda esa muvozanat buzilishi kuzatildi. Yani OKMK o'z maydonida ko'proq muvaffaqiyatga erishib (26 ochko), safarda ko'p bora "qoqilgan" (15 ochko). "So'g'diyona"da esa teskarisi, jizzaxliklar o'z muxlislari qarshisida xafa qilarli natijalarga erishgan – 16 ochko. Biroq safardagi o'yinlarda sovg'a-salomlarga ko'milib qaytgan (24 ochko).

"Nasaf"ning chempionlikni qo'lga kiritishiga yana bir qaancha sabablarni keltirish mumkin. Bosh murabbiy Ro'ziqul Berdiev, jamoaning fidoyi muxlislari va hokazo... Nima bo'lgan taqdirda ham, klubga Osiyo Chempionlar ligasidagi yurishi ham zafarli bo'lishini tilab qolaman.

Oqil Abdubarnoev tayyorladi.

"Nasaf" chempionligining siri nimada?