Albatta, barcha muxlislarni jamoamiz tarkibidagi o'zgarishlar diqqat markazida bo'lib turibdi.

Jamoamiz safida faoliyat yuritgan himoyachi Shuhrat Muhammadiev jamoamizni tark etgan. U endi Toshkentning “Lokomotiv” jamoasi tarkibida faoliyatini davom ettiradi. O'z o'rnida Shuhrat Muhammadievga klubimiz va barcha muxlislarimiz nomidan yutuqlarimizga qo'shgan hissalari uchun kattadan-katta tashakkurlar bildirib qolamiz. SH.Muhammadievning keyingi faoliyatiga ulkan zafarlar tilaymiz.

Shuningdek yangi mavsumdan jamoamiz safida Azamat Allaniyozov, Ildar Mamatkazinlar ham faoliyat yuritmaydigan bo'lishdi. Bu futbolchilar endi boshqa klublarda to'p tepadi.

Qolgan barcha mahalliy futbolchilarimiz bilan yangi shartnomalar tuzildi. Shuningdek yangi mavsumdan jamoamizning asosiy tarkibida bir qator yosh futbolchilar ham to'p tepishadi. Bunga Islom Kenjaboev, Navro'zjon Izatillaevlarni misol tariqasida aytish mumkin. Shuni alohida takidlash joizki, keyingi yillarda klubimiz qoshidagi futbol maktabidan ko'plab iqtidorli yosh futbolchilar etishib chiqmoqda. Shuni ishonch bilan aytish mumkinki, bunday yosh futbolchilar bu yilgi futbol mavsumida futbol ishqibozlarining etirofiga sazovor bo'lishadi.

Legioner futbolchilarimiz Dragan Cheran va Igor Golbanlar yangi mavsumda ham jamoamiz sharafini himoya qilishadigan bo'lishdi. Bu futbolchilar bilan ham yangi shartnomalar imzolangan. Yana bir legionerimiz Ognen Krasich bilan yaqinda o'zaro kelishuvga erishildi. U shu kunlarda jamoamiz tarkibiga kelib qo'shiladi.

Jamoamiz rejaga ko'ra, 7 yanvar kuni xorijiy yig'inga jo'nab ketadi. U erda ikki hafta mobaynida yangi mavsum tayyorgarliklarining uchinchi bosqichi bo'lib o'tadi. Ana shu tayyorgarlik jarayonida murabbiylarimiz yangi futbolchilarni ham ko'rikdan o'tkazishi mumkin.

Murabbiylarimiz xorijiy yig'in mobaynida 6ta o'rtoqlik uchrashuvlari ham o'tkazishni rejalashtirishgan. Bu haqda keyinroq to'liq malumot beramiz.

"Nasaf": Muhammadiev, Allaniyozov va Mamatkazin ketdi, Cheran, Golban va Krasich qoladi