Namangandagi bahsdan keyin mehmon jamoa vakillari tashkilotchilikka nisbatan etiroz bildirishyapti. Klub rasmiylarining aytishicha, o'yin tugashiga 20 daqiqa qolganda maydon atrofida turishi kerak bo'lgan zaxira to'plari yig'ishtirib olingan. Stadionda bo'lgan saytimiz xodimi esa "ball boy"lar "Navbahor"ning 2-goli urilganidan keyin to'pni toshkentlik futbolchilarga uzatish o'rniga uzoqroqqa olib qochganini bildirdi.

Qoidaga ko'ra, rasmiy uchrashuvda foydalanish uchun kamida 8 ta to'p bo'lishi kerak. Ularni uzatib turish uchun maydon atrofida 10 nafar (eng kamida) "ball boy" bo'lishi lozim. Buni mezbon jamoa taminlaydi.

Agar "Paxtakor" vakillarining gapi rost bo'lsa, uchrashuvning oxirgi 20 daqiqasida reglament qo'pol ravishda buzilgan (16.11).

Bu haqda malumot olish uchun yarim tunda O'zPFL xodimlarini bezovta qildik. Tashkilot vakili mazkur holat uchrashuv komissari bilan hozircha muhokama qilinmaganini bildirdi:

"Agar adashmayotgan bo'lsangiz, bu juda xunuk vaziyat. Ertaga uchrashuv komissari o'yin bo'yicha batafsil malumot topshirganidan keyin holatni o'rganamiz. Shunaqa bo'lgani tasdiqlansa, mezbon jamoaga nisbatan tegishli tartibda chora ko'riladi.
Xotirjam bo'lishingiz mumkin, bunaqa narsalarni etibordan chetda qoldirmaymiz. Qaysidir klub o'yin natijasiga tasir ko'rsatish uchun eng mayda detallar orqali qoidani buzsa ham, O'zPFL tegishli tartibda chora ko'rib keladi".

Yodingizda bo'lsa, bu jamoalar o'rtasida Superliganing birinchi davrasida kechgan uchrashuvda boshqacharoq vaziyat bo'lgan: "Paxtakor" fan-klubi etakchisi Javohir Shokirov texnik zonada paydo bo'lib, autga chiqib ketgan to'pni raqib futbolchisiga qaytarib berish o'rniga, boshqa tomonga namoyishkorona tepib yuborgan edi. Shu tufayli o'yin yakunlangach stadionda janjal kelib chiqqan. Tartib-intizom qo'mitasi epizodni o'rganib chiqib, Toshkent klubini jarimaga tortgan edi.

Muallifning telegramdagi kanali → FR| futbol ANALIZI

"Navbahor" jazolanishi mumkin