Bu haqida klub matbuot xizmati malumot berdi.

Yurtimizda muborak Ramazon hayiti shukuhi kezib yurgan damlarda “Navbahor” jamoasining ko'p ming sonli muxlislarining fidoyiliklariga hurmat tariqasida, qolaversa, qutlug' ayyom sovg'asi sifatida 6 may kuni bo'lib o'tadigan Coca-Cola Superliga 7-turidan o'rin olgan “Navbahor” – “Bunyodkor” uchrashuviga kirish BEPUL qilib belgilandi.

Bu ham, albatta, futbol muxlislari auditoriyasini kengaytirish, stadionga tomoshabinlarni jalb qilish yo'lida amalga oshirilayotgan keng ko'lamli ishlarning uzviy davomidir.

Shu munosabat bilan, muxlislarga 6 may kungi uchrashuvda Namangan shahridagi “Markaziy” o'yingohiga bepul kirib, stadiondagi CIP sektordan tashqari boshqa barcha sektorlarga joylashishlari mumkinligini malum qilamiz.

Stadionga tashrif buyuruvchilardan jamoat tartibi va muxlislik madaniyatiga qatiy rioya qilishlari, xususan, huquq-tartibot organlari xodimlari, atrofdagi boshqa tomoshabinlar va futbol uchrashuvi rasmiylariga nisbatan hurmat saqlashlari lozimligini eslatib o'tamiz.

Ushbu futbol bayramiga bevosita guvoh bo'lishni istagan barcha millionlar o'yini ixlosmandlarini “Markaziy” stadioniga chorlaymiz! Zero, fidoyiligi va jonkuyarligi bo'yicha mamlakatimizda alohida o'ringa ega bo'lgan “Navbahor” muxlislari jamoani odatdagidek, yuqori saviyada qo'llab-quvvatlab, bayramona muhit hosil qilishlariga aslo shubha yo'q.

Eslatma: “Navbahor” – “Bunyodkor” uchrashuvi 6 may kuni soat 18:30 da boshlanadi.

"Navbahor" muxlislari uchun yaxshi xabar