Belek shahridagi "Papilon" stadionida bo'lib o'tgan mazkur o'yinda namanganliklar 0:1 hisobida mag'lubiyatga uchrashdi.
Takidlash joizki, mazkur uchrashuvning birinchi bo'limida ustunlik ko'proq namanganliklar tarafida bo'ldi. Ammo futbolchilar yuzaga kelgan vaziyatlardan samarali tarzda foydalana olishmadi. Shuningdek, batumiliklar ham kam sonli hujumlardan samara chiqara olishmadi. Natijada tanaffusgacha hisob ochilmadi.
Ushbu bahsning ikkinchi bo'limi teng kurashlar ostida kechdi. Tashabbus goh u, goh bu jamoa tarafida bo'ldi. Ammo yakuniy zarba noaniq chiqdi.
Uchrashuv yakunlanishiga sanoqli daqiqalar qolganida "Navbahor" himoyachilari o'z jarima maydonchalari ichida raqib futbolchisiga nisbatan qo'pollik ishlatishdi. Natijada uchrashuv bosh hakami namanganliklar darvozasiga 11 metrli jarima zarbasi belgiladi.
"Dinamo" futbolchisi penaltini aniq amalga oshirib, darvozabon Dilshod Hamroevni dog'da qoldirdi – 0:1.
"Lochinlar" muvozanatni tiklashga intilishgan bo'lsa-da, buning uddasidan chiqa olishmadi va Turkiyadagi o'rtoqlik uchrashuvlaridagi ilk mag'lubiyatni tan olishga majbur bo'lishdi.
Mazkur bahsda "Navbahor" ustozi Andrey Kanchelskis maydonga quyidagi futbolchilarni tushirdi: O'tkir Yusupov, Obid Jo'raboev, G'iyosjon Komilov, Xurshid Muxtorov, Mirzohid G'ofurov, Sardor Telyakov, Amirbek Jo'raboev, Abbos G'ulomov, Islom Isoqjonov, Anvar Hojimirzaev, Ruslan Bolov.
Zaxiradan maydonga tushganlar: Dilshod Hamroev, Mirkomil Lokaev, Zabihillo O'rinboev, Komil Tojiddinov, Husayn Ergashboev.
Eslatib o'tamiz, namanganliklar oldingi o'rtoqlik bahslarida Turkmanistonning "Axal" klubini 1:0, Serbiyaning "Rad" jamoasini 2:1, Armanistonning "Uest" klubini 2:0 hisoblarida mag'lubiyatga uchratib, Qozog'istonning "Jetisu" klubi bilan 1:1, Ukrainaning "Kolos" jamoasi bilan 0:0 hamda Gruziyaning "Samtredia" klubi bilan 1:1 hisoblarida durangga imzo chekishgandi.
"Navbahor" Turkiyada bugun so'nggi nazorat-sinov o'yinini Norvegiyaning "Eydsvold" (Tern) klubiga qarshi o'tkazadi.
Izohlar