Hindiston deganda bollivud olami ko'z oldimizga keladi. Lekin ayrim pallalarda kino va futbol olami bir yo'lda kesishganini ko'rganmisiz? "Navbahor"ning raqibi "Mumbay Siti" shunday jamoalardan biri hisoblanadi. OCHL tarixida o'tgan mavsumga kelibgina guruh bosqichida Hindiston jamoasi ishtirok etdi va bu joriy mavsumda ham takrorlanadigan bo'ldi.

Klub haqida

2014 yil 30 avgust kuni rasman klub sifatida tashkil qilingan. O'sha yilning aprelida hindistonlik aktyor Ranbir Kapur Bimal Parex bilan birga "Mumbay Siti" akciyalari uchun tenderda g'olib chiqqan. Shu yili klub "Manchester Siti" sobiq ustozi Piter Ridni murabbiy sifatida elon qildi. Rid "Arsenal"da to'p tepgan shveciyalik Freddi Yunberg unga ko'maklashdi. Keyingi yillarda Mumbayda Jahon yulduzlaridan Nikolas Anelka, Diego Forlan to'p tepdi.

Klub tashkil qilinganiga 2 yildan so'ng mamlakat chempionligini qo'lga kiritdi. 2019 yilning 28 noyabrida "Abu-Dabi United Group" sho'ba korxonasi bo'lgan "City Football Group" klubning 65% ulushini sotib olgani va "Mumbay Citi"ni "shaharliklar" guruhiga sakkizinchi klub sifatida qo'shib olgani malum bo'ldi. 2020/2021 yilgi mavsumda tarixda birinchi marotaba ham chempionat, ham ligada g'olib chiqdi. "Mumbay Siti" ketma-ket ikki mavsumdan buyon chempionlikni hech kimga bermay kelmoqda.

Jamoani bugungi kunda angliyalik mutaxassis Dez Bakingem boshqarmoqda. 38 yoshli murabbiy Yangi Zelandiyaning turli yoshdagi va milliy terma jamoasida assistent, bosh murabbiy lavozimlarida faoliyat olib borgan. Umuman klub tashkil qilingandan buyon jamoani faqat xorijlik murabbiylar boshqarmoqda.

Jamoa uy uchrashuvlarini 7 960 nafar tomoshabinga mo'ljallangan "Mumbay futbol arena"da o'tkazadi. "Navbahor" dekabr oyida mazkur o'yingohda mehmon bo'ladi.

Tarkibi va legionerlar

Tarkibning deyarli 23 foizini legionerlardan iborat. Alberto Noguera (Ispaniya), Nasser El Xayati (Marokash), Yoel van Neif (Niderlandiya), Rostin Griffits (Avstraliya), Tiri (Ispaniya), Jorje Pereyra Diaz (Argentina), Greg Styuart (Shotlandiya). Ular orasida "Paxtakor"da omadi chopmagan Rostin Griffitsni tanidingiz, deb o'ylaymiz. Jamoaning o'rtacha yoshi 25,4ni tashkil qiladi.

"Mumbay Siti" - "Navbahor". Qaysi jamoaning tarkibi qimmatroq?

"Mumbay Siti"ning tarkibi transfermarket portali bo'yicha 5,78 million evroga, "Navbahor" 10, 39 million evroga baholangan. Namangan jamoasi raqibidan deyarli 2 barobar qimmat ekanini ko'rishimiz mumkin. "Lochinlar" safida Jamshid Iskanderov eng qimmat futbolchilar qatorini boshqarib turgan bo'lsa (850 ming evro), Yoel van Neif (500 ming evro). Malumot uchun, Superliganing "Neftchi" (6,03 million evro), OKMK (6,76 million evro), "Nasaf" (7,65 million evro), "Paxtakor" (11,20 million evro) jamoalari "Mumbay Siti"dan qimmatroq hisoblanadi.

Klubda mahalliy o'yinchilar bilan bir qatorda legionerlar ham to'p tepadi. Namanganliklarga qarshi o'yin oldidan jamoada eng yuqori maosh oladigan futbolchilar bilan tanishamiz.

Greg Styuart (Shotlandiya): yillik ish haqi - 218400 funt-sterling;

Alberto Nogera (Ispaniya): yillik ish haqi - 182000 funt-sterling;

Xorxe Pereyra Dias (Argentina): yillik ish haqi - 161200 funt-sterling;

Lallianzuala Chhangte (Hindiston): yillik ish haqi - 104000 funt-sterling.

Abdulaziz Iskandarov

"Navbahor"dan arzon tarkibga ega "Mumbay Siti" haqida