Bir necha mavsumdan beri O'zbekistonda to'p tepayotgan gruziyalik hujumchi "Navbahor" va "Neftchi" safida maydonga tushdi. Birinchi davradan so'ng "Neftchi" bilan xayrlashgan futbolchi ikkinchi davrani qaerda o'tkazishi haqida ham o'ylayapti. Biz Toma bilan uning ketishi, Superligadagi taassurotlari va kelajak rejalari haqida suhbatlashdik.

- "Neftchi" klubini tark etish haqida qaror qanday qabul qilindi? Bu qaror siz tomoningizdan chiqdimi yoki klub tashabbus ko'rsatdimi?

- Qaror ikki tomonlama qabul qilindi. Klub rahbariyati bilan ochiqchasiga gaplashib oldik, mavjud vaziyatni xolis baholadik va bu bosqichda ketish ham men, ham jamoa uchun to'g'ri qaror bo'ladi, degan xulosaga keldik. "Neftchi"ga menga ishongani va imkoniyat bergani uchun minnatdorman. Bu klubni doim hurmat qilaman.

- "Neftchi"da o'ynaganingizdan qanday taassurotlar qoldi? Muxlislar va jamoadagi muhit haqida nima deysiz?

- Faqat iliq xotiralar qolgan. "Neftchi" - katta tarixga ega klub, muxlislari esa juda sodiq va futbol bilan yashaydigan insonlar. Har bir o'yinda, uyda ham, safarda ham ularning qo'llab-quvvatlashini his qildik. Jamoada ham yaxshi muhit bor edi, do'stona munosabat hukm surardi. Har bir kun uchun jamoadoshlarga minnatdorman.

- Hujumda raqobat darajasi qay darajada edi? Asosiy tarkibdagi o'rningizni saqlash qiyin bo'ldimi?

- Har qanday klubda raqobat bo'ladi, ayniqsa hujum chizig'ida. Bu futbolda odatiy holat. Menimcha, raqobat futbolchini rivojlantiruvchi asosiy omillardan. Albatta, oson kechmagan paytlar bo'ldi, lekin har kuni mashg'ulotlarda o'zimni ko'rsatishga harakat qildim.

- Faoliyatingizni ikkinchi davrada qaerda davom ettirmoqchisiz? O'zbekistonda qolish niyati bormi?

- Hozircha bir necha variantlarni ko'rib chiqyapman. O'zbekistondan ham, xorijdan ham takliflar bor. Qaerda menga ishonch va motivaciya kuchli bo'lsa, o'sha erda faoliyatimni davom ettiraman. O'zbekiston menga yaqin bo'lib qolgan, shu bois bu erda qolish ehtimoli ham bor.

- Sizni futbolda nima motivaciya qiladi? Har kuni maydonga chiqishga kuch-g'ayratni qaerdan olasiz?

- Futbolga bo'lgan muhabbat - mening asosiy motivaciyam. Bolaligimdan futbolchi bo'lishni orzu qilganman va har bir o'yin - shu orzuni yana qayta jonlantirish imkoniyati. Shuningdek, oilam, ayniqsa qizim - mening tayanch va ilhom manbaim. Ular uchun men faxrli namuna bo'lishni xohlayman.

- Birinchi davradagi eng og'ir va eng yoqimli o'yinlar qaysilar bo'ldi?

- Aslida, har bir mag'lubiyatli o'yin og'ir bo'ladi. Lekin Kubokdagi bir o'yinni aytish mumkin: mag'lubiyat keyingi bosqichga chiqish imkoniyatidan mahrum qildi. Bunday o'yinlar xotirada qoladi, chunki muhim imkoniyat qo'ldan boy berilganini his qilasan. Eng yoqimli payt esa birinchi davraning oxiridagi o'yin bo'ldi, u erda jarima zarbasidan to'p kiritdim. Bunday lahzalar ishtiyoq beradi.

- Farg'ona vodiysidagi ikkala etakchi jamoa - “Navbahor” va “Neftchi”da o'ynadingiz. Sizningcha, vodiy klublarida o'ynashdagi eng katta qiyinchilik nimada? Moliyaviy holatmi, muxlislar bosimimi, yoki boshqa narsami?

- Vodiy jamoalarida o'ynash - bu doim katta masuliyat. Bu erda muxlislar juda ehtirosli, ular har bir o'yindan natija kutardi. Bunday bosim bor, lekin u foydali - sizni har doim ko'proq ishlashga undaydi. Albatta, moliyaviy muammolar ham bor, bu har bir klubda bo'lishi mumkin. Lekin men uchun asosiysi - jamoadagi muhit va ishga bo'lgan munosabat.

"Neftchi"dagi sahifam yopildi, ketish ikki tomon uchun ham foydali bo'lardi" - Toma Tabatadze bilan intervyu