Ўз даврининг етук ҳужумчиларидан бири бўлган Қутибоев қаршисидаги ҳар қандай ҳимоячини бутун ўйин давомида саросимада ушлаб турарди. Якка курашлардан сира ўзини олиб қочмаган собиқ футболчи, бутсаларини михга илгач маълум муддат мураббий сифатида ҳам фаолият юритди. Аммо сўнгги йилларда Қутибоев катта футболда кўриниш бермай қўйди. Про-лиганинг энг камтарона клубларидан бири бўлган “Орол” жамоасини узоқ йиллар давомида мусобақада муносиб иштирок этишини таъминлаб келган Неъматулла Қутибоев жамоада юзага келган молиявий қийинчиликларга ортиқ чидай олмади ва натижада истеъфога чиқишни лозим топди. Сўнгра бошқарув рулига Темур Турдиев келди ва ўйновчи мураббий сифатида адашмасак икки йил “Орол”ни бошқарди. Яқинда Турдиев ҳам жамоасини ўзгартиришга қарор қилди. Аниқроғи Темурни “Сўғдиёна” устози Александр Мочинов ўз ёнига чақириб олди. Хўш, эндиликда Нукус жамоасини ким бошқаради. Дрижёрлик вазифасида яна Неъматулла Қутибоевни кўрамизми? Бу борада мураббийнинг ўзи нима дейди?

– Очиғини айтганда, анча вақтдан бери катта футболдан узоқдаман десам ҳам бўлади. Айрим сабабларга кўра, бироз дам олмоқдаман. Нукус олимпия захиралари коллежида ҳам фаолият юритаётгандим. Ҳозир у ерда ҳам ишни тўхтатганман. Тўғриси, яна “Орол”га қайтаманми йўқми бу ҳақда тайинли бир гап айтишим қийин. Жамоага аввало сидқидилдан ишлаш учун керакли шароитларни яратиб бериш лозим. Кейин астойдил енг шимариб ишласангиз бўлади. Балки бизда ҳам вақти келиб шундай бўлар. (Кулиб) Жамоани 8 йил мобайнида бошқарган бўлсам, ҳар йили яхши ҳам бўлиб кетар дея умид қилиб ишладик. Келгуси режалар ҳақида аниқ гап айтиш қийин. Ҳаммасини вақт кўрсатади. Лекин яқин орада катта футболга қайтиш ниятим бор. Севган касбимни жуда соғинганман – дейди Қутибоев.

“Орол” жамоаси ҳозирча йиғинни бошлагани йўқ. Балки раҳбарият яқин вақт ичида жамоага катта эътибор қаратар.

Исломбек Рустамбеков.

Неъматулла Қутибоев яна катта футболга қайтмоқчи