Xo'sh, o'zbekistonlik futbolchilar karantin davrini uyda qanday o'tkazishmoqda? Ular muxlislarga bu borada nimalarni tavsiya qilishadi?

- To'g'risi, maydonni juda ham sog'indim. Bu sog'inchni oddiy so'zlar bilan shunchaki tariflashning imkoni yo'q. Ishonchim komilki, muxlislarimiz ham futbol uchrashuvlari yana start olishini intiqlik bilan kutishmoqda.

Lekin ayni paytda barchamizdan karantin qoidalariga qatiy rioya qilgan holda uyda qolish, bu orqali koronavirus pandemiyasi tarqalishini oldini olishda ulkan xissa qo'shish talab etiladi.

Men ham uyda qolgan holda o'z vaqtimni mazmunli o'tkazishga harakat qilyapman. Zerikishga aslo vaqt ham bo'lgani yo'q. O'zbekiston Davlat Jismoniy tarbiya va sport universiteti 3-bosqich talabasi bo'lganim sabab ayni vaqtda onlayn darslar davom etyapti. Darslarni yaxshi o'zlashtirishga harakat qilyapman. Qolaversa, Yunus Og'uzning Amir Temur asarini o'qib chiqyapman.

Biz – futbolchilar uchun sport formasini ushlab turish juda muhim. Shu sababli murabbiylar bilan aloqada bo'lgan holda mashg'ulotlarni uyda davom ettiryapman. Bu borada muxlislarga ham uyda mashq qilib turishni maslahat bergan bo'lar edim.

Karantin bahonasida oila azolarimiz bilan birgalikda vaqtni mazmunli o'tkazish imkoniyati ham vujudga keldi. Bundan unumli foydalanishimiz, asosiysi – shaxsiy gigiena qoidalariga qatiy rioya qilishimiz lozim. Agar shifokorlar tavsiyalariga to'liq amal qilsak, koronavirusni albatta engamiz!, - dedi istedodli futbolchi.

Nilufar Qudratova: "Uyda vaqtni mazmunli o'tkazishga harakat qilyapman"