Бугунги кунда футбол ўйини вақтида пайпоғининг орт қисмини тешган ҳолда ҳаракат қиладиган футболчилар сони тобора ортиб бормоқда. Келинг, бунинг сабабларини билишга ҳаракат қилиб кўрамиз.

Мазкур жараён баъзи футбол юлдузлари, жумладан, Жуд Беллингем ва Неймар томонидан амалга оширилгандан кейин кўпчиликнинг эътиборини тортди.

Пайпоқлардаги ҳалқалар сони футболчиларда фарқ қилади. Баъзилар бир ёки иккита тешик ҳосил қилишни афзал кўришса, "Манчестер Сити" ҳимоячиси Кайл Уокер бу борада ҳаддан юқори натижага эришган.

Бундай кўринишни оммалаштирган дастлабки футболчилардан бири 2018 йилги жаҳон чемпионатида Англия терма жамоаси сафида ҳаракат қилган ҳимоячи Дэнни Роуз эди.

Нима учун футболчилар пайпоқларини йиртиб ташлайди?

Ўйинчилар оёқ мушакларидаги босимни камайтириш мақсадида пайпоқларни атайин шундай аҳволга келтирмоқда, чунки уларнинг кўпчилиги футбол учун мўлжалланган пайпоқларнинг зич ҳолатда тикилгани, бу эса қон айланиш билан боғлиқ муаммоларга олиб келиши ҳамда уларнинг ҳаракатига салбий таъсир ўтказишини билдирган.

"Манчестер Сити" аъзоси Жэк Грилиш ёки "Навбаҳор" ярим ҳимоячиси Сияваш Ҳақназарий эса бутун пайпоқни қурбон қилиш ўрнига бошқа усулни қўллайди, яъни у пайпоқларни мускулдор оёқ мушакларининг пастки қисмига тушириб қўйиш билан кифояланади.

Футбол қоидаларин нима дейди?

Футбол тўғрисидаги қонунда пайпоқларни йиртишни тақиқловчи ҳеч қандай қоида йўқ (ҳозирча), аммо ҳакам ўйинчининг пайпоқлари белгиланган талабларга зид ҳолатда эканлигини кўрса, уни алмаштиришни талаб қилиши мумкин.

Футболчиларнинг либослари билан боғлиқ қонун-қоидаларга кўра, футболчиларнинг пайпоқ кийиши шарт эканлиги қайд этилган, бироқ унда ҳалқа ҳосил қилиш-қилмаслик тўғрисида ҳеч қандай банд мавжуд эмас.

Аммо қонунга истаган вақт ўзгартиришлар киритилиши мумкин. Масалан, португалиялик мураббий Жозе Моуриньо бу ҳолатга ўз норозилигини билдирган.

Оқил Абдубарноев тайёрлади.

Нима сабабдан футболчилар пайпоқларини атайин йиртишади ва бу қоидаларга зидми?