"Avvalo, Qirg'iziston futzal federaciyasiga minnatdorchiligimni bildirmoqchiman. Barcha ishtirokchilarga saralashda muvaffaqiyat tilayman.

Tayyorgarlik masalasiga kelsak, biz bu erga o'z vazifamizni bajarish uchun keldik. Eng avvalo, Osiyo chempionatiga yo'l olishimiz kerak. Har bir o'yinda g'alaba qozonishimiz shart. Saralash bosqichiga 100 foiz tayyormiz.

Bizda ham bazi muammolar bor, aytaylik, jarohat olgan o'yinchilar masalasida, ammo bu boshqa mavzu, baribir to'liq tayyormiz. Barcha futbolchilarimiz shay turibdi. To'g'ri, so'nggi o'rtoqlik uchrashuvida Yaponiyaga yutqazdik, lekin bundan yaxshi saboq oldik. Bu o'yin bizga foyda keltirdi deb o'ylayman.

Tarkib masalasida to'xtaladigan bo'lsak, saralash o'yinlariga deyarli asosiy tarkibni olib keldik. Choriev jarohatdan keyin tiklanish jarayonida, chunki u uzoq vaqt davomida jiddiy jarohatlar olgandi. Keyinroq u yana jarohat oldi va bu safargisi ancha og'ir edi. Uning noyabr oyida safga qaytishiga umid qilamiz. U astoydil shug'ullanmoqda, lekin hozircha hatto klubiga ham yordam berishga tayyor emas.

Ropievga kelsak, bizda yangi davr boshlanmoqda. Qirg'iziston bosh murabbiyi aytganidek, har kimning o'z mezonlari bor. Bizning ham o'z vazifalarimiz mavjud. Bizda yangi federaciya, yangi rahbariyat, terma jamoada deyarli 70 foiz yangi futbolchilar jamlangan. Biz kelajakka qarab ish tutamiz va shu mezonlardan kelib chiqib, tarkib yoshartirilmoqda. Bu tabiiy jarayon. Ropiev haqiqatan ham malakali futbolchi, lekin kelajakni o'ylab, istiqbolli yosh futbolchilarni jalb qilishimiz kerak. Bunday tajribali o'yinchilar o'z o'rnini yoshlarga bo'shatib berishi tabiiy hol", – dedi 42 yoshli mutaxassis.

Eslatib o'tamiz, O'zbekiston saralash bosqichida Qirg'iziston, Sharqiy Timor hamda Falastin terma jamoalariga qarshi bahs olib boradi. Nodir Eliboev shogirdlari dastlabki uchrashuvni 20 sentyabr sanasida Falastin terma jamoasiga qarshi o'tkazadi.

Nodir Eliboev: "Bizda yangi davr boshlanmoqda. Tajribali o'yinchilar o'z o'rnini yoshlarga bo'shatib berishi tabiiy hol"