Uchrashuvdan so'ng terma jamoamiz yordamchi murabbiyi Nodir Eliboev fikrlarini bildirib o'tdi.

"So'nggi pallada mahoratimiz etishmagani sezilib qoldi. Bugun kechagiga nisbatan yaxshiroq harakat qildik, deb o'ylayman. Bu bilan raqibni sust o'ynadi demoqchi emasman. Argentina ham bugun ko'proq ter to'kdi. Biz to'pni nazorat qilishga harakat qildik. Birinchi o'yindan keyin to'rt nafar o'yinchimiz jarohat olgan edi. Shunga qaramay qolgan futzalchilar o'zlarini yaxshi tomondan ko'rsata olishdi. Deylik, Dilshod Rahmatov asosiy o'yinchimiz. Lekin, bugun uning o'rni bilingani yo'q. Demak, biz to'g'ri yo'ldamiz.
Bugun namoyish qilgan o'yinimiz ko'pchilikka yoqdi, deb o'ylayman. Rustam Umarovga o'rinbosar yo'q degan mavzuni yopamiz. O'zbekistonda yana darvozabonlar etishib chiqayotganiga amin bo'ldik.
Avvalgi yig'inlarda Afrika chempioni, mana bugun Jahon chempioni bilan o'ynadik. Sekin-asta rivojlanyapmiz.
Argentina terma jamoasi bugun birinchi o'yinga qaraganda kuchliroq bo'lib tushishini bilardik. Abbos Elmurodov orqali o'ynashga, o'yin tempini buzishga harakat qildik. O'ylaymanki, ushbu qarorimizni muxlislar to'g'ri tushunishdi.
Argentina bilan ikki bahs barchamiz uchun katta tajriba vazifasini o'tab berdi. Shu orqali kamchiliklarimizni aniqlab olamiz. Hujumni yakunlaydigan pallada nimadir etishmayapti. Jahon chempioniga qarshi munosib to'p tepishga intildik,- deydi Nodir Eliboev.

Nodir Eliboev: "So'nggi pallada mahoratimiz etishmagani sezilib qoldi"