Jamoa ko'rsatayotgan natijalar yaxshi deb bo'lmaydi. Xo'sh, natijalarning salbiy ko'rinish olishiga nima sabab bo'layotgani yuzasidan jamoa himoyachisi Nodir Qo'yboqov fikrlariga quloq tutdik.

Malumot uchun, Nodir Qo'yboqov shu vaqtga qadar “So'g'diyona” yoshlar jamoasida o'ynab kelgan. Mavsum boshida “Zomin” klubiga kelib qo'shilgan edi.

- Nodir, “Zomin” bugungi kunda Pro ligadagi holati yaxshi emas. Bunga nima sabab bo'lmoqda?

- Mavsumni yaxshi boshlagandik. Lekin keyinchalik natijalarimizda pasayishlar kuzatildi. Bunga nima sabab bo'layotganini hozir aniq ayta olmayman. Albatta, qayd etayotgan natijalarimiz yaxshi emas va bundan muxlislarimiz ham norozi.

- Moliyaviy holat qanday?

- Albatta, moliyaviy muammolarimiz bor. Buni yashirib o'tirmoqchi emasman.

Jamoada yaxshi futbolchilar ko'p. O'ylaymanki, ikkinchi davrada natijalarimiz ijobiy ko'rinish oladi. Bu holatda qolib ketmoqchi emasmiz. Vaziyatni yaxshilash va natijalarimiz bilan muxlislarni xursand qilish niyatidamiz. Hozirgi holatimiz vaqtinchalik deya olaman.

- Ortda qolgan 13 turda eng qiyin o'yin kimga qarshi kechdi?

- Pro ligada birorta o'yin oson kechmayapti. Har bir bahs o'ziga yarasha qiyin o'tmoqda. Eng qiyin o'yin deb, nazarimda, “Turon”ga qarshi o'z maydonimizda o'tkazgan bahs bo'ldi.

- “So'g'diyona” yoshlarida o'ynab kelgansiz. Asosiy tarkibga qo'shila olmaganingizga nima sabab bo'ldi?

- Tajriba etishmadi deya olaman. Jamoaning asosiy tarkibida jiddiy raqobat bo'lib kelgan. Hozirda ham ancha kuchli himoyachilar to'planishgan. Menda bu borada tajriba etishmadi va shu sababli ham asosan yoshlar jamoasida o'ynab keldim.

- Jamoada yaxshi himoyachilar to'planishgan deb aytdingiz. Qaysi bir ijrochilarning harakatlari sizga yoqadi?

- Elyor Orifov va Sardor Qulmatov o'yinlari menga maqul keladi. To'g'ri, ikkisining o'yin uslubi boshqacha. Lekin ikkisida ham o'zingiz uchun nimadir olish imkoni bor. Xullas, men bu futbolchilarni kuzatib kelaman.

- Kelgusidagi rejalaringiz qanday?

- Birinchi navbatda Superligada debyut qilishni maqsad qilganman. Shu vaqtgacha Superligada o'ynamaganman. Shuningdek, terma jamoa libosida o'ynash orzusidaman.

Nodir Qo'yboqov: “Zomin”da moliyaviy muammolar bor”