Bundan bir necha kun avval O'FF binosida ustoz Axbor doda Imomxo'jaev bilan ko'rishdim. Shunda u kishi, farzandlaridek bo'lib qolgan jurnalist, ham shogirdlari Hamroxon Musurmonova tomonidan, “O'zimizning Axbor aka” nomli kitobini yozganligi va shuni taqdimoti ustida ish olib borayotganliklarini aytib o'tdilar.

Ko'plab tadbirlarni o'tkazib yurganimiz uchun bo'lsa kerak, ustoz bu masalada aynan bizni hamkorlikka chaqirganliklari, o'zimizga bo'lgan ishonchni yana bir bor oshirdi va tez kunda Diyor bilan hamkorlikda tadbir rejasini tuzdik. Huddi chet ellarda bo'lgani kabi, avval kitob taqdimoti bo'lishi, unda ishtirok etadigan mehmonlarga kitob, muallif va kitob qahramoni haqida axborotlar berilishi kerak edi. Tashqarida esa kitob savdosi avjida bo'lishi ham rejamizda bor edi. Kitob ham juda arzon, bor yo'g'i 12 000 so'm.

Bu erdan biz o'z tanishlarimizni, u erda Diyor dodasining yaqinlarini yig'a boshladi. Qisqa muddat ichida amalga oshirilgan tadbirimizga Axbor dodaning yuzdan ortiq yaqinlari tashrif buyurdilar. Ularning quvonchlari, bizning quvonch emasmi? Shunday fayzli yoshda, fayzli tadbirning shohi bo'lib turgan Axbor Imomxo'jaevni ko'rar ekanman, bir zum ko'z oldimdan dodam o'tdilar. Agar mening dodam 1997 yil O'zbekiston - Qozog'iston uchrashuviga olib bormaganlarida, men futbolga bunday mukkasidan ketmagan bo'lar edim va men hozir Axbor doda bilan bir stolda o'tirmagan bo'lar edim...

Tadbir huddi biz kutganimizdek bo'ldi. Avvaliga faqat keksa yoshdagi tanishlar kela boshladilar. Biroz o'tib, ular qatorini yoshlar to'ldirdilar. Bugungi kunda qalam tebratayotgan, TV, radio, gazeta va saytlarda ishlayotgan hamkasblarimiz tadbirni to'ldira boshladilar. "Lokomotiv", "Paxtakor", "Andijon", "Olmaliq"dan vakillar qatnashib o'z arxivlari uchun kitoblarni xarid qildilar.

Murojaatimiz bekor ketmagani ko'rdik, saytimiz o'quvchilari ham tadbirda qatnashib bizni xursand qildilar.

Tadbir chog'ida men ham ustozga atab yozilgan kitobga dastxat qo'ydirish uchun o'z navbatimni kutib turardim. Ustozning oldilarida, men uchun yana bir qadrdon ustozlardan biri bo'lgan Vladimir Safarov ham o'tirar edilar. Vladimir Ashotovich va Axbor Rustamovich o'rtalarida turar ekanman, Vladimir Ashotovichga, "men hozir o'zimni Pele va Maradonaning o'rtasida turgandek his etayapman", dedim. Bunga javoban, Vladimir Ashotovich, "qo'ysangchi", deya jilmayib qo'ydilar. Haqiqatdan ham bu ikki kishining o'zbek futboli jurnalistikasiga qo'shgan hissalari haddan tashqari ziyoda. Axbor doda faoliyatini TV va radioga bag'ishladilar, undan so'ng ko'plab kitoblarning muallif bo'ldilar. Vladimir Ashotovichning esa o'zbek futboliga oid 70 yillik (!!!) statistikasi mavjud.

Shuni aytishim mumkinki, tadbirda qatnashmagan OAV vakillari yoki kelishi mumkin bo'lib, kela olmagan muxlislar juda katta voqealikni kuzata olmadilar.

Hali kitoblar etarlicha, yana bir ikki tadbir o'tkazish rejada yo'q emas. Bunisini o'tkazib yubormaysiz deb o'ylaymiz.

FOTOGALEREYAni tomosha qilish.

Nodirxo'ja Yuldashev

Nodirxo'ja Yuldashev: Ustozning tadbiridan fotomaqola...