"Mavsumdagi birinchi o'yinimiz bo'lgani bois oxirida charchab qoldik. Xudo xohlasa, chempionat boshlansa, bundan yaxshiroq harakat qilamiz. Xatolarimizni ko'rib oldik.
"Navbahor"ga qarshi 1-tur o'yinida ijobiy natija ko'rsatishga intilamiz", – "Nasaf" hujumchisi Husayn Norchaev.

"O'yin ajoyib o'tdi. Finallar doim qiyin o'tgan. Kubokda imkoniyatni boy berganimiz sabab Superkubokni yutishga majbur edik, yakunda uni qo'lga kiritdik. Buning uchun jamoaga rahmat aytaman, hamma birgalikda astoydil mehnat qildi. Bizni qo'llab-quvvatlab turgan barcha muxlislarga o'z minnatdorchiligimni bildiraman.
Murabbiy hamma o'yinchilarni bahsga yaxshi tayyorladi. Uning O'zbekistondagi ilk o'yini edi. Shu sabab u yutishimiz shart ekanligini va o'zbek futboliga moslashib ketishi uchun yordam berishimizni so'radi. Yakunda, uning yuzini erga qaratmadik. Qo'ldan kelgancha harakat qildik va uddaladik.
"Nasaf" mudofaa chizig'ida zich o'ynashi tufayli qanotlardan uzatilgan paslar evaziga gol urishimiz mumkinligini aytgandi va buni amalda isbotladik", – "Paxtakor" hujumkor yarim himoyachisi Aziz Turg'unboev.

"20-daqiqada jarohat oldim. Ertaga tibbiy tekshiruvdan o'taman. Manimcha, jiddiy emas.
Juda qizg'in o'yin bo'ldi. Ikki jamoaga ham oson bo'lgani yo'q. Xudoga shukrki, biz g'alaba qozondik.
Maydon yaxshi holatda ekan. Fursatdan foydalanib, muxlislarga ham rahmat aytaman.
Murabbiy Cheranga yaqinroq poziciyada o'ynashimni aytgandi. Mavsum davomida oldingi chiziqda birgalikda harakat qilamiz.
Voyneski jamoaviy o'yinni xush ko'radi. Shu bois ko'pincha sheriklarimga pas uzatdim. Bundan tashqari, Cheran bilan tandem hosil qilishga urindim", – "sherlar" vingeri Sardor Rashidov.

Norchaev, Turg'unboev hamda Rashidovning Superkubok uchrashuvidan keyingi fikrlari