Biz o'z navbatida yangi klub bilan shartnoma imzolagan Obid Jo'raboevning fikrlari bilan qiziqdik.

“Kuni kecha “Buxoro” jamoasi bilan bir yillik shartnoma imzoladim. Aslida ushbu jamoaga bizni Hakim Fuzaylov taklifi bilan tashrif buyurgandim. U inson bilan o'tgan yilda “Dinamo”da birgalikda ishladik va jamoani Superligaga qaytara oldik. Shu o'rinda menga katta ishonch bildirgan Fuzaylovga minnatdorchilik bildiraman.

- Siz “Dinamo” bilan Superligada to'p tepish istagida ekaningizni takidlagandingiz. Bu jamoani tark etishingizga nima sabab bo'ldi?

- Bilasizmi, “Dinamo” bilan shartnomamiz bir mavsumga mo'jallangan bo'lib, dekabrda poyoniga etdi. Biz klub bilan qo'yilgan vazifani uddasidan chiqib, Superligaga chiqdik. Shu o'rinda bir jihatni aytib o'tishim kerak. O'tgan mavsumni oxirlariga borganda, aytaylik, 3 tur qolganida vazifa bajarilganidan so'ng rahbariyat xorijlik mutaxassislar bilan muzokara o'tkazishga kirishgandi. Bu holatdan Hakim Fuzaylovning ham xabari bor edi. Tayyorgarlik boshlanish arafasida hech kim bilan aloqaga chiqqani yo'q. O'tgan yilgi tarkibdan bir nechtasini saqlab qolishdi va qolganlarga javob berishdi. Chaqirilmagan joyga borgandan nima foyda bor? Alam qilgani shuki, Superligaga chiqish yo'lida mehnat qilindi, oxirigacha kurashdik. Hech bo'lmasa tarkibda shulardan 10 nafari qolsa kerak degan taxmin bor edi. Ming afsuski, taxminimiz o'zini oqlamadi.

- “Dinamo”dan ketishingizni baribir kutmagan bo'lsangiz kerak?

- Albatta. Chunki menda jamoada qolsam kerak degan taxmin bor edi. Har holda mehnat qilib, Pro-ligadan Superligaga chiqishimiz oson bo'lgani yo'q. Rahbariyat shularni hisobga olgan holda tarkibda tajribali yigitlarni saqlab qolsa kerak deb o'ylagandim. Bunday bo'lishini birgina men emas, qolgan futbolchilar uchun ham kutilmagan xol bo'ldi. Har bir futbolchi elitada to'p tepishni istaydi. Bundan fojea yasamaslik kerak. Taqdirga yozilgani bo'ladi.

- Hakim Fuzaylov yaxshi ishlagan holda samarqandliklarga yordam berdi. Uning istefoga chiqarilishiga munosabatinngiz qanday bo'ldi?

- Hakim Qayumovichning tark etishi ham kutilmaganda ro'y berdi. Samarqandda katta byudjet bo'lmasa-da, yaxshi jamoani shakllantirdi. Aslida “Dinamo”ni Superligaga chiqishiga hech kim ishonmagandi. Lekin mutaxassis buni bajara oldi. Rahbariyat qo'ygan vazifani uddasidan chiqdi. Lekin rahbariyat kutilmaganda xorijlik mutaxassis izlashga tushdi. Bundan albatta Fuzaylovning ham xabar topdi. Nima bo'lsa ham unga ishonch bildirilsa yomon bo'lmasdi. Har holda yangi murabbiy kelib, u futbolchilarni chaqirib, jamoaviy o'yinni yo'lga qo'yishiga ko'p vaqt talab qiladi.

Maqsadimiz “Buxoro”ni Superligaga qaytarish hisoblanadi. Klub o'z mavqeiga ega bo'lgan jamoalardan biri. Muxlislari klubni faqat elitada ko'rishni istaydi. Bu yildan rahbariyat barcha sharoitlarni yaratmoqda. Bu orqali jamoani Superligaga qaytarish hisoblanadi. Ishonamanki, Pro-ligada ijobiy natijalar namoyish qilib, jamoani kuchlilar qatoriga qaytara olamiz.

- 2022 yilgi Pro-liga o'yinlaridan nimalarni kutmoqdasiz?

- Nazarimda, yangi mavsum yanada qiziqarli bo'ladi. Chunki “Andijon”, “Mashal” va “Turon” jamoalari Superligadan tushib ketishdi. Kuchlilar qatoriga qaytish uchun davogarlar soni ko'paydi. O'yinlar qiziqarli va murosasiz kechadi. Biz nasib qilsa, 2022 yilgi mavsumni muvaffaqiyatli tugatamiz degan maqsad bor.

Obid Jo'raboev: "Chaqirilmagan joyga borgandan foyda yo'q. Alam qilgani shuki..."