Osiyo Chempionlar ligasi-2 turnirining 2025/26 yilgi mavsumiga qura tashlandi. O'zbekistonning "Andijon" klubi "B" guruhida Qatarning "Al Ahli", Turkmanistonning "Arqadag'" va Bahraynning "Al Haldiya" klublari bilan kuch sinashadi. Guruhdagi raqiblarning har biri o'ziga xos kuchli va zaif tomonlarga ega. "Al Ahli" iqtidorli xorijlik va mahalliy futbolchilarga ega, Turkmaniston terma jamoasi asosini tashkil etuvchi "Arkadag'" yaqinda Osiyo Chellenj ligasida bosh sovrinni qo'lga kiritgan. "Al Haldiya" 2020 yil tashkil etilganiga qaramay, tezda ichki chempionatda etakchilar safiga qo'shildi va xalqaro darajada tajriba to'plab bormoqda.

"Al Ahli" 2024/2025 yilgi mavsum Qatar Yulduzlar ligasida to'rtinchi o'rinni egalladi. Aslida turnirga Qatarning uchinchi jamoasi yo'l olishi kerak edi. Uchinchi o'rinni egallagan "Al-Garafa" Qatar amiri kubogini qo'lga kiritgani sababli Elit Chempionlar ligasiga yo'llanma oldi. Shu bois, uchinchi o'ringa ajratilgan chipta to'rtinchi o'rinni egallagan jamoaga berildi.

"Al Ahli" kuchli tarkib va etarli tajribaga ega bo'lganiga qaramay, etakchilarga qarshi hech narsa qila olmagan (jumladan, "Al Sadd"ga 0:5 hisobida yutqazgan) va boshqa o'yinlarda ham darvozasidan ko'p gol o'tkazib yuborgan (Qatar SKga 0:3 hisobida yutqazgan). Ligani 4-o'rinda yakunlagan jamoaning to'plar nisbati -1 ni tashkil etgani ham yuqoridagi so'zlarimizga isbot bo'la oladi.

"Al Ahli"ni xorvatiyalik murabbiy Igor Bishchan boshqaradi. 47 yoshli mutaxassis Xorvatiyaning 21 yoshgacha bo'lgan jamoasi, "Dinamo Zagreb", Saudiya Arabistonining "Al Shabab" klublaridagi faoliyati orqali tanish. Bishchan "Dinamo Zagreb" bilan Xorvatiya chempionati va superkubogida bosh sovrinni qo'lga kiritgan. Shuningdek, "Olimpiya" bilan Sloveniya chempionati va kubogida zafar quchgan.

"Al Ahli" tarkibida ko'plab xorijlik futbolchi mavjud, ayrimlari ikki mamlakat fuqaroligiga ega. Ularning eng mashhuri, shubhasiz, 2014 yilgi jahon chempioni, germaniyalik Yulian Draksler hisoblanadi. 31 yoshli hujumkor yarim himoyachi 2023 yildan beri ushbu klub sharafini himoya qiladi. Shuningdek, niderlandiyalik Mishel Vrap, franciyalik Ibrohim Diallo, ispaniyalik Erik Eksposito kabi iqtidorli futbolchilar jamoa sharafini himoya qiladi.

"Arkadag'" Turkmaniston terma jamoasining asosini tashkil etadi, shu bois, bu jamoaga engil ko'z bilan qarash kerak emas, aksincha, jiddiy yondashish talab etiladi.

Gurbanguli Berdimuhamedov 2023 yil asos solgan va mahalliy chempionatda shu paytga qadar yutqazish uyoqda tursin, hatto durang o'ynamagan "Arkadag'" o'tgan yil Osiyoning uchinchi darajali musobaqasi hisoblangan Chellenj ligada g'olib chiqdi va Osiyo Chempionlar ligasi-2 yo'llanmasini qo'lga kiritdi. Qolaversa, turkmanlar mezbonlik uchrashuvlarini suniy qoplamali maydonda o'tkazishadi, bu esa raqiblarga noqulaylik tug'diradi.

2025 yilda "Arkadag'"ning 15 nafar futbolchisi Turkmaniston terma jamoasiga chaqirilgan. Shuningdek, boshqa klub safida termaga jalb etilganlarning ayrimlari huquqiy jihatdan "Arkadag'"ga tegishli hisoblanadi. Yozgi transfer oynasida "Arkadag'" yaqin taqibchisi hisoblangan "Ahal"ning uch nafar o'yinchisini tarkibga qo'shib oldi, bu esa ularning yanada kuchayganidan dalolat beradi. Jamoaga Ahmet Allaberdiev murabbiylik qiladi.

"Arkadag'" mahalliy chempionatda joriy mavsum bilan qo'shib hisoblaganda, ketma-ket 71 o'yindan beri g'alaba qozonmoqda, biroq Chellenj ligada 8 o'yinning 2 tasida yutqazdi.

2020 yil tashkil etilgan "Al Xolidiya" tezda Bahrayn futbolida g'ayrioddiy yuksalishni boshdan kechirdi. Birinchi mavsumidayoq (2020-21) ular faqat bitta mag'lubiyat bilan 2-o'rinni egallab, Bahrayn ikkinchi divizionidan yuqoriga ko'tarilishdi. Keyinchalik, klub o'z mavqeini mustahkamlab, ketma-ket ikki mavsumda: 2022/23 va 2023/24 yilgi mavsumlarda chempionlikni qo'lga kiritdi.

"Al Xolidiya" 2024/25 yilgi Bahrayn Qirollik kubogi sohibiga aylangan. Mahalliy chempionatda esa ikkinchi o'rinni egalladi. Ali Ashur jamoa bosh murabbiyi hisoblanadi. 43 yoshli bahraynlik murabbiy faoliyati davomida asosan, mahalliy klublarni boshqargan. Shuningdek, Kuvaytda bir yil ishlagan. Ali Ashur o'zi ishlagan deyarli barcha klubda mamlakat chempionligini qo'lga kiritgan.

"Al Xolidiya" yozda sezilarli kuchayishga erishdi. Jamoaning eng qimmatbaho futbolchisi marokashlik Ayub Al Amlud hisoblanadi (800 ming evro). 31 yoshli o'ng qanot futbolchisi yozda Eronning "Persepolis" klubidan kelib qo'shildi. Shuningdek, "Sidney"dan Anas Uahim jalb etildi. Qolaversa, tarkibdagi ko'pgina futbolchilar Bahrayn terma jamoasi azosi hisoblanadi.

Qura haqida "Andijon" bosh murabbiyi va futbolchilarning fikri qanday?

"Andijon" klubi matbuot xizmati bosh murabbiy Maksim Shackix va bir necha jamoa azolarining OCHL-2 qurasi haqidagi fikrlarini elon qildi.

Maksim Shackix: "Qurani hech qachon ko'rmayman. Chunki baribir hamma bilan o'ynash kerak. Bu erda kuchsiz jamoalar bo'lmaydi. Bizning guruhda “Al-Ahli” top jamoa hisoblanadi. Shuningdek, Bahrayn hamda Turkmaniston chempionlari ham bor. Yaxshi jamoalar. Bu kuchli guruh. Mana, endi biz o'z kuchimizni sinab ko'ramiz".

Erjan Tokotaev: “Yaxshi, teng kuchli guruh, yaqqol favorit yo'q. Hamma jamoalar chiroyli futbol namoyish etishga qodir. Yuqori natija ko'rsatish umidida turnir boshlanishini kutmoqdamiz”.

Islom Mamatkazin: “Qurani biz o'ylagandek o'tdi, desa ham bo'ladi. Jamoamizdagi ko'plab futbolchilar bilan birga guruhimizda “Al-Nassr” bo'lishini xohlagandik. Xudo xohlasa, yaxshi o'yinlar ko'rsatib, guruhdan chiqsak pley-offda “Al-Nassr” bilan o'ynash nasib qiladi, deb o'ylayman”.

Otabek Jo'raqo'ziev: “Quraga keladigan bo'lsak, zo'r jamoalar tushdi, deb o'ylayman. Qatarda chempionat endi boshlandi. Raqibimiz bitta uchrashuv o'tkazdi. Turkmaniston chempionati davom etmoqda, raqibimiz hali birorta uchrashuvda mag'lub bo'lgani yo'q. Bahrayn chempionatiga kelsak, ular ham mamlakatning grand klublaridan biri hisoblanadi. Bizni oldinda juda ajoyib uchrashuvlar kutib turibdi. Bo'lajak o'yinlarda muhim g'alabalarni qo'lga kiritib, keyingi bosqichga chiqish uchun harakat qilamiz hamda muxlislarimizni xursand qilamiz”.

Bektemir Abdumannonov: “Qurada Saudiya klubi - “Al-Nassr” tushishini kutgandim. Yaxshi raqiblar bo'ldi. Guruhdan chiqishimizga imkoniyatimiz ko'proq. Qatar, Bahrayn va Turkmanistonni yaxshi jamoalari ro'baro bo'ldilar. Munosib o'yinlar ko'rsatib, keyingi bosqichga chiqishga harakat qilamiz. Balki keyingi bosqichlarda “Al-Nassr” bilan to'qnash kelib qolsak kerak. Ronalduga qarshi o'ynash niyatimiz bor. Guruhda maksimal ochkolarni to'plashga bor kuchimizni ishga solamiz. Hammasi yaxshi raqiblar. Ochkolarni ko'paytirishga harakat qilamiz. Balki finalgacha borarmiz. Omad kelsa ko'p narsa hal bo'lib ketishi mumkin. Muxlislarimizni xursand qilmoqchimiz”.

"Andijon" klubi o'rin olgan guruhning Osiyo Chempionlar ligasi-2 turniridagi taqvimi

1-tur

17 sentyabr (chorshanba)

“Arkadag'” (Turkmaniston) - “ANDIJON” (O'zbekiston)

“Al-Ahli (Qatar) - “Al-Xaldiya” (Bahrayn)

---------------------------------------------------

2-tur

1 oktyabr (chorshanba)

“ANDIJON” (O'zbekiston) - “Al-Ahli” (Qatar)

“Al-Xaldiya” (Bahrayn) - “Arkadag'” (Turkmaniston)

---------------------------------------------------

3-tur

22 oktyabr (chorshanba)

“ANDIJON” (O'zbekiston) - Al-Xaldiya” (Bahrayn)

“Al-Ahli” (Qatar) - “Arkadag'” (Turkmaniston)

---------------------------------------------------

4-tur

5 noyabr (chorshanba)

“Arkadag'” (Turkmaniston) - “Al-Ahli (Qatar)

“Al-Haldiya” (Bahrayn) - “ANDIJON” (O'zbekiston)

---------------------------------------------------

5-tur

29 oktyabr (chorshanba)

“Al-Xaldiya (Bahrayn) - “Al-Ahli” (Qatar)

26 noyabr (chorshanba)

“ANDIJON” (O'zbekiston) - “Arkadag'” (Turkmaniston)

---------------------------------------------------

6-tur

24 dekabr (chorshanba)

“Arkadag'” (Turkmaniston) - “Al-Xaldiya” (Bahrayn)

“Al-Ahli” (Qatar) - “ANDIJON” (O'zbekiston)

Oqil Abdubarnoev tayyorladi.

OCHL-2. "Andijon"ning guruhdagi raqiblari hamda murabbiy va futbolchilarning quraga munosabati