O'zbekiston chempioni "Sepaxon" (Eron), "Al Duhail" (Qatar) va "Al Al Taavon" (Saudiya Arabistoni) klublariga qarshi kurash olib boradi.

Qiziqarli tomoni shundaki oxirgi bir hafta ichida har uchala raqib murabbiylar shtabida yangi mutaxassislar ish boshladi.

Kecha, 4 aprel kuni "Al Taavon"ning portugaliyalik bosh murabbiyi Xose Manuel Gomesning o'rnini niderlandiyalik 55 yoshli Jon Van Der Brom egalladi. Van Der Brom murabbiy sifatida "Anderlext" bilan birga Belgiya chempioni va Superkubogi sohibi bo'lgan. "Genk" ustozi sifatida Belgiya kubogini qo'lga kiritgan. U 2021 yilning dekabr oyida "Genk"dan ketganidan keyin ishsiz yurgandi. Faoliyati davomida "Den Xaag", "Vitess", "AZ Alkmaar", "Utrext" (barchasi Niderlandiya), "Anderlext" va "Genk" (ikkalasi Belgiya) klublarini boshqargan.

25 mart kuni "Al Duhail" bosh murabbiyi portugaliyalik Luis Kastroning o'rnini argentinalik mashhur futbolchi Ernan Krespo egalladi. Krespo murabbiylik faoliyati davomida "Modena" (Italiya), "Banfild", "Defensa Xustisiya" (ikkalasi Argentina), "San Paulu" (Braziliya) kabi klublarni boshqardi. "Defensa" bilan 2020 yilda "Copa Sudamericana" musobaqasida g'olib bo'ldi, 2021 yilda "San Paulu" bilan Paulista chempionati oltin medallarini qo'lga kiritdi.

28 mart kuni "Sepaxon" murabbiylar shtabida yangi portugaliyalik mutaxassis Luis Martines ish boshladi. U bosh murabbiy Muhammad Navidkiyaga yordam beradi. Luis Martines faoliyati davomida "Sporting", "Portimonense", "Braga" (barchasi Portugaliya), "Tottenxem" (Angliya), "Zenit" (Rossiya), "Al Ahli" (Saudiya Arabistoni) va Saudiya Arabistoni milliy terma jamoalarida turli lavozimlarda ishlagan.

Eslatib o'tamiz, "Paxtakor" 7 aprel kuni 1-tur doirasida "Sepaxon"ga qarshi maydonga tushadi. Bahs Toshkent vaqti bilan soat 22:15da boshlanadi.

OCHL-2022. Bir hafta ichida "Paxtakor"ning uchala raqibida yangi murabbiylar ish boshladi