Evropaning top chempionatlari ichida eng qiyin va qiziqarli liga deb ko'pchilik APLni tan oladi.

Qaysidir murabbiyning zo'rligi haqida gapirayotgan bo'lsangiz, agarda o'sha mutaxassis APLda ishlamasa, unda futbol bilimdonlari APLga kelsinchi, nima karomat ko'rsatishini o'shanda ko'ramiz, deydiganlar ko'pchilikni tashkil etadi.
Bu albatta nisbiy. Yani, murabbiy qanday salohiyatga ega ekanligini faqat APLda ishlab ko'rsatishi shart, degan o'lchov yo'q. Bu absurd. Har doim ham kuchli mutaxassislar APLda ishlab ketishlari shart emas.

Hozirgi qahramonimiz Antonio Konte esa aynan shu o'lchov bilan ish ko'radiganlarga ham javob berdi.
2011 yilda "Yuventus"ni qo'lga olganida va "botqoq"da yotgan turinliklarni yuqori elitadagi o'rnini qaytarganida, bu natijani tasodifga yuyganlar ham bo'lgandi. O'shanda Konte A Seriyadagi o'zining debyut mavsumidayoq "Yuventus" bilan chempionlik shohsupasigacha chiqqandi va mavsumni mag'lubiyatsiz yakunlashga erishgandi. Bu hammaning ham qo'lidan keladigan ish emas. Tarkibi o'sha payt uchun u qadar kuchli ko'rinmagan "Yuve"ni chempion bo'lishini hech kim taxmin ham qilmagandi.
Lekin Antonio Konte murabbiy sifatida haqiqiy katta futboldagi dastlabki qadamni ancha dadil bosgandi.
B Seriyadan A Seriyaga qaytgan "Yuventus"ning ishlari unchalik yurishmay turganda Konte "qutqaruvchi" rolini qoyilmaqom tarzda o'ynagandi. Ketma-ket ikki yilni 7-o'rinda tugatgan "Yuventus" uchun kelasi mavsumdayoq yuqori cho'qqini zabt etish bu (o'sha payt uchun) fantastik natija edi.
Keyinchalik esa Konte "Yuventus" bilan yana ikki yil chempion bo'ldi. A Seriyada 3 mavsum ishlagan Konte har yili "skudetto"ni qo'lga kiritdi.

"Yuventus"ni uzoq tanaffusdan keyin ECHLga qaytargan mutaxassis ham Konte bo'ladi. Ammo Konte "Yuventus" bilan xalqaro arenada ulkan g'alabalarga erisholmadi. Bunga ulgurmadi. Aslida Kontening "Yuventus"dan ketishi ham ECHLga borib taqaladi. Yani Konte klub rahbariyatidan ECHL uchun tarkibga kuchli ijrochilarni jalb etishni so'raydi. Ammo klub rahbariyati Kontening short-listidagi futbolchilarni harid qilishga hali tayyor emasligini bildiradi. Bundan g'azablangan Konte esa ketishga qaror qiladi va shartnomani uzaytirishga shoshilmaydi. Klub rahbariyati va Konte o'rtasida kelishmovchilik yuzaga keladi. Bu orada esa Konte bilan Italiya futbol federaciya bog'lanadi va murabbiy "skuadra adzurra"ni qabul qilib olishga rozilik beradi. "Yuventus" rahbariyati Kontening iltimoslarini inobatga olib, unga futbolchilarni harid qilishga rozi bo'lgan payt esa kech bo'lgan bo'ladi. Konte esa lavzidan qaytmasligini va Italiya termasini boshqarishga rozilik berganini aytadi. "Yuventus" rahbariyati esa bir vaqtning o'zida ikkala jamoada ishlashga ham ruxsat beradi. Ammo Konte bunga rozilik bermaydi. Italiya terma jamoasidagi faoliyati esa dunyoni yana bir marotaba lol qoldira oladi.
Konte avvaliga Italiya terma jamoasi bilan Evropa chempionatining final bosqichiga yo'l oladi. Evro-2016da esa Italiya terma jamoasi tarixidagi eng kuchsiz deya etirof etilgan tarkib bilan chorak finalga qadar etib boradi. Evropa chempionatida Kontening Italiyasi nima karomat ko'rsatganini barcha biladi. Chorak finalda Germaniyaga penaltilar seriyasidagina imkoniyatni boy bergandi. Italiya matbuoti esa "skuadra adzurra"ni guruhdan chiqishini ham katta natija deb bong urgandi.
Italiya esa nafaqat guruhdan chiqdi, balki chorak finalga qadar etib bordi. Bu yo'lda esa ular amaldagi Evropa chempioni - Ispaniyani yo'lda qoldirib ketishga muvaffaq bo'lishdi. Germaniya bilan o'yinda ham mag'lubiyatga uchramagan Italiyaga "lotoreya"da omad etishmadi.
Bu esa Kontening qanday salohiyatga ega, murabbiy sifatida nimalarga qodirligini amalda ko'rsatib bergandi. Evropa chempionatidan oldin Konteni "Chelsi" bilan bitim tuzgani va yangi mavsumdan boshlab Londonda ish boshlashi malum bo'lib ulgurgandi.

Aynan Evropa chempionatidan keyin Konte degan murabbiy borligi, Antonioni top murabbiylar qatorida tilga olish ancha avj oldi.
Vaholanki, Konte bundan avval ham "Yuventus" bilan ko'p savollarga javob berishga ulgurgan.
Lekin jahon futbolida eng zo'rlarni APLdagi o'yini va ishi bilan o'lchaydiganlar uchun Konte endi tanilgandi guyoki.
Antonio Konte murabbiylik faoliyatini Angliyada davom ettirishga qaror qilganidan keyin, APLda unga hech kim raqobat qila olmasligini, "Chelsi"ni birinchi mavsumdayoq chempion qilishiga ishonishimni aytgandim. Ko'pchilik esa Kontening salohiyatiga biroz shubha qilishini bildirib, Kontega bu erda raqobat ancha yuqori bo'lishini takidlagandi.
Italiyada unga raqobatchi yo'q, Evropa chempionatida esa Gvardiola, Mourinyu kabi mutaxassislar ishlamasligi bilan taqqoslangandi.
Konte uchun APL murabbiy sifatida muammo bo'lmasligini aytganimda, futbolni emas, shaxmatni ko'rishni tavsiya etganlar ham chiqqandi.

Kontening darajasiga, uning qanday salohiyatga ega ekanligiga xolis baho berilganini noto'g'ri tushunganlar uchun Konte yana bir bor chiroyli javob berdi. Natijada esa APLda, ha, o'sha Angliya premer ligasi deya atalmush chempionatda ham ilk mavsumda oltin medallar qo'lga kiritildi.

Eng qizig'i, Konte qabul qilib olgan "Chelsi" o'tgan yili autsayderlar orasida adashib qolgan, evrokuboklarsiz qolib ketgan "aristokratlar" edi. Joze Mourinyuning istefosiga sabab bo'lgan, "Chelsi" uchun sharmandali natijadan keyin ko'pchilik Kontega qiyin bo'lishini taxmin qilgandi. Albatta hech bir chempionatda, hech qaysi murabbiy shunchaki osonlikcha chempionlikka erisha olmaydi. Buning ortida katta mehnat, mashaqqat yotadi. Konte esa shunday qiyinchiliklar, mashaqqatlarda toblangan, kuchli, top murabbiy.
Avvaliga ilk mavsumida "Bari"ni A Seriyaga qaytargan. Keyinchalik "Siena"ga A Seriya "chiptasi"ni taqdim etgan Konte nihoyat Italiyaning oliy divizionida, yani A Seriyada ishlashga rozilik beradi.
A Seriyada ham B Seriyadan keyin hech ham to'rttalikka kirolmayotgan "Yuventus"ni eski statusini tiklaydi. Keyin Italiya terma jamoasi tarixidagi eng kuchsiz jamoa bilan Evropani lol etadi.

Mana joriy mavsumda eng ko'p tilga olinadigan APLda ham chempionlikni nishonlamoqda.
Konte tug'ma chempion. Futbolchilik davrida ham "Yuventus"da yuqori darajada o'ynagan Konte murabbiylik faoliyatini yanada ko'tarinki ruhda davom ettirmoqda.
Konte qaerda, qaysi jamoada ishlamasin, faqat yuqori maqsadlarni ko'zlaydigan va ko'zlaganda ham o'sha maqsadga erishadigan kam sonli murabbiylardan biri.
Etibor bering, Konte qaysi klubni qabul qilib olmasin, o'sha paytda jamoa qiyin davrlarni o'tkazayotgan bo'ladi. Konte kelgach esa, jamoada tezda chempionlik kayfiyati, muhiti paydo bo'ladi. Eng qiziq tomoni, Konte katta transferlarni ko'p ham amalga oshirmaydi. Imkon qadar qo'l ostidagi futbolchilarni yangi darajaga, yangi pog'onaga chiqara oladi. Bu endi haqiqiy murabbiylik salohiyatini eng oliy ko'rinishi. Yani, murabbiy yo'q narsadan bor qila olish qobiliyatiga ega bo'lmog'i lozim. Konte esa bu narsani isbotlashdan charchamayapti. Konte "Yuventus"da ham, Italiyada ham, mana "Chelsi"da ham avvalo JAMOA tashkil qila oldi. Buni esa juda qisqa vaqt ichida barpo etdi.
Angliyadagi eski "bo'rilar" Arsen Venger, Joze Mourinyu kabi mutaxassilar orasida yo'qolib qolmadi, aksincha ularni ham munosib ravishda dog'da qoldirishga erishdi. APLDa paydo bo'lgan va ko'pchilik maqtashdan charchamaydigan Gvardiola (Manchester Siti) ham ko'p millionli transferlari bilan ECHL yo'llanmasi uchun kurashayotgan bir paytda, Konte David Luizni ortga qaytarib, taktik sxemasi uchun Markos Alonsoni olib keldi va chempionlikka erishdi.
Bu yili Kontega chempionlik yo'lida Mauricio Pochettino ("Tottenxem") hamda Yurgen Klopp ("Liverpul") raqobat qilmoqchi bo'lishdi. Ammo bu ishni uddalash ularga qiyinchilik tug'dirdi. Antonio Konte APLdagi "bo'rilar" ichida o'zini sherdek tutdi va endilikda haqli tarzda bo'yniga Angliya premer ligasining ham oltin medallarini taqadigan bo'ldi.

Konte kuchli taktik, strateg, uch himoyachili uslubni "Yuventus"da joriy qilgan, Italiya terma jamoasida yana hammaga ko'z-ko'z qildi va "Chelsi"ga kelib, Angliyada ham o'z falsafasidan chekinmagan holda raqiblarini yo'ldan uloqtirib tashladi.
Bir so'z bilan aytganda, Konte haqiqiy italyan murabbiyi.
Angliyaga keldi va chempion. Ko'p yillar "Yuventus"da, Italiya terma jamoasida birga elkama-elka birga ishlagan yordamchisi Karrera shu yili yozda mustaqil ish boshladi. Rossiyaning "Spartak" jamoasiga bosh murabbiy bo'lgan Karrera Kontedan o'rganganlarini Rossiya premer ligasida qo'lladi va "Spartak"ning 16 yillik noxush seriyasiga chek qo'yib, nihoyat Romancevdan keyin moskvaliklarni chempionga aylantirdi.

Konteni oddiy askarga o'xshataman. Askarlar bilasiz dovyurak bo'lishadi. Konteda ham shunday xislat bor. O'z vaqtida "Bari"ni A Seriyaga chiqarib, keyin yana quyi divizionda "Siena"ga A Seriya yo'llanmasini qo'lga kiritishda ko'maklashgan Konte, undan keyin "botqoq"da qolgan "Yuventus"ni ketma-ket chempionga aylantirdi. Italiya terma jamoasini ham og'ir vaqtda boshqarishga rozilik berish - bu dovyuraklikdan darak beradi. O'tgan yilgi mavsumdan keyin "Chelsi"ni boshqarish ham bu mardlik. Chunki Konteni oldida bir qator variantlar, yanada maqulroq tanlovlar ko'p edi. Kuchli xarakterga ega va temir intizomni xush ko'radigan murabbiy Londonga borishga qo'rqmadi. Konte bir vaqtlari "Arecco"da (2006) boshlagan ishini mana hozirda "Chelsi"da davom ettirmoqda.

O'sha paytdagi oddiy askar endilikda haqiqiy generalga aylandi, desak mubolag'a bo'lmasa kerak.

Antonio Kontening murabbiylik faoliyati:

2006-2006 yillari: "Arecco" (27 o'yin, 11 g'alaba, 8 durang, 8 mag'lubiyat)
2007-2007 yillari: "Bari" (67 o'yin, 33 g'alaba, 22 durang, 12 mag'lubiyat)
2009-2010 yillari: "Atalanta" (14 o'yin, 3 g'alaba, 4 durang, 7 mag'lubiyat)
2010-2011 yillari: "Siena" (44 o'yin, 22 g'alaba, 14 durang, 8 mag'lubiyat)
2011-2014 yillari: "Yuventus" (151 o'yin, 102 g'alaba, 34 durang, 15 mag'lubiyat)
2014-2016 yillari: Italiya terma jamoasi (25 o'yin, 14 g'alaba, 6 durang, 5 mag'lubiyat)
2016-... "Chelsi" (44 o'yin, 35 g'alaba, 3 durang, 5 mag'lubiyat)

Umumiy natijalari: (372 o'yin, 220 g'alaba, 91 durang, 61 mag'lubiyat)

Kontening murabbiylik faoliyatidagi yutuqlari:

B Seriya chempioni: 1 (2008/2009)
Italiya chempioni: 3 (2011/2012, 2012/2013, 2013/2014)
Italiya Superkubogi: 2 (2012, 2013)

Angliya chempioni: (2016/2017)

Shaxsiy yutuqlari:

"Kumush o'rindiq" mukofoti sovrindori (2009)
"Oltin o'rindiq" mukofoti sovrindori (2012, 2013, 2014)
Italiyada yil murabbiyi "Oskar del Kalcho" (2012, 2013, 2014)
Yil murabbiyi: "Globe Soccer Awards" (2013)
"Premio Nicola Ceravolo" sovrindori (2013)

Shahboz Beg'amov

Oddiy askardan generalga aylangan - Konte