Дарвозаларга 4 та гол урилган учрашувда "қалдирғочлар" сафида энг яхши футболчи бўлган Одил Ҳамробеков ўйиндан сўнг фикрлари билан ўртоқлашди.

"Мавсумнинг биринчи тури учун қизиқарли ўйин бўлди деб ўйлайман. Ўйин темпи, руҳи, голлар мухлисларни зериктириб қўйгани йўқ. Икки жамоа ҳам чиройли ўйин кўрсатди. Ҳисобда олдинда боришимизга қарамай ўйинни ташлаб юбормадик. Натижа ўйинга яраша кўриниш олди",- дейди Одил Ҳамробеков.

- "Бунёдкор" учрашувнинг барча қисмларида барқарор ўйин кўрсатди. Бу кўпроқ нима билан боғлиқ?

-Стартда бир хил темпни ушлаш қийин албатта. Лекин Туркиядаги йиғинларда жисмоний ҳолатимизга кўпроқ эътибор бердик ва шунинг эвазига бу ўйинда икки таймда ритмни ушлай олдик.

- Кучли рақиб фонида "қалдирғочлар" яхши ўйин кўрсатди ва устунлик қилди. Жамоа турнир жадвалида қайси ўринларни эгаллайди?

- Ҳар бир жамоа майдонга ғалаба учун чиқади. Чемпионат якунига етганидан сўнг кузда жадвалга қараймиз. Имкон қадар юқори ўринларга курашамиз.

Одил Ҳамробеков: "Бунёдкор" қайси ўринни эгаллайди? Жадвалга кузда қараймиз"