- "Traktor"dagi ilk o'yinimdayoq sovrin yutdik. Bu istalgan sportchi uchun ham yaxshi holat. Taassurotlar zo'r. Mana terma ixtiyoriga ham etib keldik, endi CAFA turniriga tayyorgarlikni boshlaymiz.

- Bu yangi bino. Bu erdagi sharoitlar qanday ekan?

- Yomon emas. Barcha shart-sharoitlar bor. Futbolchining o'yinga tayyorgarlik ko'rishi uchun barcha sharoitlar etarli.

- Siz bu turnir uchun qanday maqsad qo'yyapsiz? Bu shunchaki o'rtoqlik turnirimi yoki bahslar rasmiy o'yindek o'tadimi?

- Termada klubdagidek ko'p bo'lmaganimiz uchun har bir o'yin, rasmiymi, oddiy turnirmi, o'rtoqlik o'yinimi, bularning barchasidan maksimal foydalanishga harakat qilamiz. Biz oldimizga qo'yilgan asosiy maqsad - jahon chempionatiga chiqishga erishdik. Endi bu yo'lda yaxshi tayyorgarlik ko'rish kerak.

- Dastlabki yig'inda barcha legionerlar ham qatnasha olmayapti. Bu jamoaga qanchalik tasir qiladi?

- Tasir qilishini vaqt ko'rsatadi. Legionerlarning o'rnida o'ynashi kerak bo'lgan futbolchilar ham imkoniyatga ega bo'ladi va termaga loyiqligini isbotlashga harakat qiladi.

- Ertaga matbuot anjumaniga kirmas ekansiz, O'mon termasi haqida fikrlaringiz.

- Turli yoshdagi termalarda O'monga qarshi 2-3 marta to'qnash kelganman. Yaxshi shakllangan jamoa. Natijalari bilan maqtana olmasa ham, raqiblarga jiddiy qarshilik ko'rsata oladigan yaxshi jamoa deb hisoblayman. Hozir Keyrush qo'l ostida yaxshi jamoa bo'lib shakllanmoqda. Bizni yaxshi o'yin kutmoqda.

- Terma jamoa ichida ham bosh murabbiy o'zgarishi bo'yicha gap-so'zlar yuribdimi?

- Termada hozircha yo'q. Oldindan bir nima deya olmayman. Rasman tasdiqlanganidan keyin bir nima deyish mumkin. Hozirgi kunda Timur Toxirovich bizning bosh murabbiy. Uning ko'rsatmalari ostida turnirga tayyorgarlik ko'ryapmiz.

Odil Hamrobekov: "Hozirgi murabbiyimiz Timur Kapadze. Uning qo'l ostida CAFA turniriga tayyorgarlik ko'ryapmiz"