Unga ko'ra, maktab yoki akademiya tarbiyalanuvchilari licenziyalash talabida ko'rsatilgan yosh toifalari o'rtasidagi musobaqalarda futbol klubi sharafini himoya qilishi, o'z navbatida futbol klubi maktab yoki akademiya moddiy texnik bazasini mustahkamlash uchun ko'maklashishi lozim edi.

O'FA bilan kelishuv asosida "Buxoro", "Qizilqum" va "Neftchi" klublari viloyat futbol maktablari bilan, "So'g'diyona", "Dinamo", "Navbahor", "Aral" esa viloyat akademiyalari bilan shartnoma imzolagan. O'tgan davr mobaynida mazkur klublar U19 va undan kichik yosh toifasidagi musobaqalarda mazkur maktab va akademiyalar tarbiyalanuvchilari bilan ishtirok etdi. Ammo klublar shartnoma bo'yicha o'z majburiyatlarini bajarish masalasini hozirga qadar ortga surib keldi. Ulardan ayrimlari shartnoma shartlarini qisman bajargan.

Shundan kelib chiqib, O'FA 14 dekabr kuni mazkur 7 klubga ogohlantirish xati yubordi. Unga ko'ra, klublar o'z zimmasidagi majburiyatni 10 kun ichida hal qilmasa, ularga qishki transfer taqiqi qo'yish masalasi tegishli qo'mitaga kiritiladi. Yani, barcha masala 24 dekabr kunigacha hal qilinishi lozim.

O'FA akademiyalar bilan shartnoma shartlariga rioya qilmagan 7 ta klubni rasman ogohlantirdi