"Coca-Cola Superligasining 7-turidan o'rin olgan uchrashuvlardagi ayrim vaziyatlarga O'zFHM mutaxassislari izoh berishdi.

Xususan, “Navbahor” - “Bunyodkor” jamoalari o'rtasidagi bahsning 39-daqiqasida mezbonlar futbolchisi raqib jarima maydonchasiga kirib kelganda to'pga birinchi bo'ldi va himoyachi uni avval chap oyog'i bilan old tomondan, so'ng o'ng oyog'i bilan raqib tizzasining ortiga kontakt sodir qildi. Ushbu vaziyatda hakam 11 metrlik belgini ko'rsatdi. Mutaxassislar fikriga ko'ra bu qaror to'g'ri bo'ldi.

Mazkur o'yinning 75-daqiqasida havodan kelgan to'p “Bunyodkor” futbolchisining avval elkasiga, so'ng qo'liga tegib maydonni tark etdi. Tezkor dinamikada bosh hakam uchun bu vaziyatni ko'rish murakkab bo'lgani sabab, holatni VAR hakamlari ko'rib chiqishdi. Ehtimoliy penalti uchun hakam maxsus monitorga taklif qilindi. Vaziyatni takroriy lavhalar orqali ko'rilgach, to'p avval futbolchining elkasiga, keyin esa qo'liga tekkani, qo'l tabiiy holatida emasligi sabab penalti belgilashga qaror qildi. Mutaxassislar fikriga ko'ra hakam qarori to'g'ri bo'ldi.

Uchrashuvning 90+3 - daqiqasida “Bunyodkor” vakillari burchakdan to'pni o'yinga kiritgan vaqtda jarima maydonchasi ichida futbolchilar yiqildi. Hakam bu vaziyatda himoyachi va hujumchi bir-birini ushlagan degan qarorga kelib, o'yinni davom ettirish kerakligini ko'rsatdi. VAR hakamlari ham holatni ko'rib chiqqach bosh hakam qarorini maqulladilar. Mutaxassislar fikriga ko'ra ushbu vaziyatda ham hakamlar qarori to'g'ri bo'ldi.

Shuningdek, Toshkentda bo'lib o'tgan “Surxon” - “Qo'qon-1912” jamoalari o'rtasida kechgan bahsning 82-daqiqasida qo'qonlik futbolchi raqib jarima maydonchasi ichida yiqildi. Hakam avvaliga 11 metrlik nuqtani ko'rsatdi, biroq yordamchi hakam uni yoniga chaqirib, holatni o'zi ko'rgan nuqtadan tushuntirdi va penaltini bekor qilishni tavsiya qildi. Yordamchi hakam ko'rsatmasiga ko'ra belgilangan penalti bekor qilindi.

Vaziyat mutaxassislar tomonidan takroriy lavhalarda ko'rib chiqilgach, “Surxon” futbolchisi to'pga o'ynagani va uning oyog'iga hujumchi kelib urilgani ko'rildi. Mutaxassislar fikricha, bosh hakamning egallagan poziciyasi unchalik ham yaxshi bo'lmagani uchun unga bu vaziyat penaltidek ko'ringan bo'lishi mumkin. Bu vaziyatda yordamchi hakamning tavsiyasi to'g'ri bo'lgan va yakuniy qaror to'g'ri chiqarilgan.

Eslatma o'rnida shuni qayd etish joiz, uchrashuv davomida bosh hakamning qaroriga uning yordamchilari yoki VAR hakamlari o'zlarining tavsiyalarini berish imkoniyatiga egalar", - deb yoziladi bayonotda.

O'FA bugungi o'yinlarda hakamlar xatosiz ishlaganini malum qildi