Mezbon O'zbekiston Olimpiya terma jamoasi esa guruh bosqichida Turkmaniston, Qatar va Eron vakillariga qarshi bahs olib boradi.

Kecha O'FA Prezidenti Abdusalom Azizov Turkmaniston bilan bo'lib o'tadigan ilk o'yin oldidan O'zbekiston U-23 terma jamoasi azolari bilan uchrashdi. Dastlab, futbolimiz rahbari yoshlar jamoamiz oldida turgan ushbu musobaqaning masuliyati haqida fikr bildirdi.

Eng avvalo, terma jamoada o'ynash har bir futbolchi uchun faxr ekanligi, jamoa birdam bo'lib, Vatan sharafi uchun kurashishi va yurt obro'sini xalqaro musobaqalarda munosib himoya qilishi kerakligini takidladi. Shuningdek, jamoaning oldida turgan asosiy maqsadlardan biri - Parij Olimpiadasiga puxta va tizimli tayyorgarlik ko'rish, har bir futbolchi professionalizm, intilish va mehnatsevarlikni o'zida mujassam qilib borishi kerakligi aytildi. Ijobiy natijaga erishish uchun O'FA tomonidan barcha zarur sharoitlar taqdim etilishi malum qilindi.

O'z o'rnida jamoamizning bir qator etakchi futbolchilari ham o'z fikrlarini bildirib o'tishdi. Shundan keyin Abdusalom Azizov murabbiylar shtabi bilan jamoaning ayni paytdagi holati va tayyorgarlik jarayoni haqida suhbatlashdi. Tibbiy shtab tomonidan futbolchilarning sog'ligi, tiklanishi va vitaminizaciyalash jarayoni borasida malumotlar eshittirildi. O'FA Prezidenti futbolchilarga eng zamonaviy, yuqori darajadagi tibbiy yordam ko'rsatish amaliyotini davom ettirishga ko'rsatma berdi.

Uchrashuv yakunida Abdusalom Abdumavlonovich masuliyatli turnir oldidan jamoamizga yana bir bor omad tiladi.

O'FA rahbari Abdusalom Azizov O'zbekiston U-23 terma jamoasi bilan uchrashdi