Boshimga yangi shapka, egnimga yangi ko'ylak kiyganim bilan men o'sha-o'sha Diyor bo'lib qolaveraman. Fikrlarim, principlarim, qarashlarim o'zgarib qolmaydi, demoqchiman. Madomiki shunday ekan, O'FF ham yangi logotip bilan o'zgarib qolmasligiga ishonaman. Bizda muammolar etarlicha, ularni hal qilmay turib brend haqida bosh qotirishga ertadir balki.

So'nggi bor Turinning “Yuventus” klubi o'z logotipini o'zgartirdi. Qanday qilib? Yangi rahbariyat kelgani yoki boshqa narsa uchun emas. Italiyada “Yuve” bir necha yillar davomida shakllanib keldi va o'z yo'lini topib oldi. Qolgan klublar davlat qaramog'idagi stadionlarga rozi bo'lib yurganida, A seriya klublari orasidan birinchi bo'lib “keksa senora” o'ziga stadion qurdi. Chempionatda ketma-ket besh yil chempionlikni qo'lga kiritdi, Chempionlar Ligasida finalgacha bordi. Mamlakatda uning brendi eng yaxshi bo'lib shakllanib kelayotgan bir vaqtda rahbariyat logotip haqida bosh qotira boshladi.

Bizda Oliy Liga o'rniga Super Liga vujudga kelish arafasida turibdi. Birinchi Liga esa Pro Liga nomini oladi. Marhamat, bu ligalar uchun yangi logolar kerak, albatta. To'g'ri, O'FF yaqinda O'FAga aylanadi, yani, O'zbekiston futbol associaciyasi. Tashkilot ichida endi ayollar futboli ham, futzal ham bor. Oson emas uni boshqarish, tartibga solish. Bu borada rahbariyatga katta sabr tilayman. Hozir esa taklif qilingan logolarni amaldagisi bilan solishtirib, bir fikrga kela olmadim. Har holda O'FFni Osiyoda amaldagi belgisi bilan ancha tanib qolishgandi.

“Atletiko” logoni qanday o'zgartirganini eslab ko'ring. O'sha-o'sha brendini zamon talablari asosida takomillashtirdi. Yani, ular Amerika kashf qilib o'tirmay, mavjud kamchiliklarni bartaraf etish haqida ko'proq o'yladi. Bizda esa xayolga kelib qolgan suratlar chizilgandek. Agar biz faqatgina bitta kompaniya bilan emas, bir nechtasi bilan ishlasak, raqobat vujudga keladi. Kompaniyalar har bir rangni nega ishlatganidan tortib, alohida belgilar nimalarni bildirishiga qadar izohlab beradi.

P.S. Maqola aslida boshqacharoq edi. O'FF logosi qolaversin, degandim. Keyin hamkasblarimdan biri O'FF O'FAga o'zgarmoqchi, yani, associaciya bo'lmoqchi, degan fikrni berdi. Agar shunday bo'lsa, nega ovozga qo'yilgan variantlarda hali ham O'FF turganini tushunmadim. Bir donagina O'FA varianti bor. Demak, o'sha variant g'olib chiqdi deb o'ylayverishim kerakmi? Unda so'rovnoma kimga kerak edi?

O'FF uchun yangi logo qanchalik zarur?