Bu musobaqada jami 14ta jamoa ishtirok etadi. "A" va "V" guruhlarida to'rttadan, "S" va "D" guruhlarida esa uchtadan jamoa o'rin olgan.

Mazkur turnirda O'zbekiston nomidan qatnashadigan "Olmaliq" futzal klubi "D" guruhida kurash olib boradi. Har bir guruhdan ikkitadan jamoaning keyingi bosqichga chiqishini hisobga olsak, "Olmaliq" juda yaxshi imkoniyatga ega.

"Olmaliq" joy olgan guruhda shuningdek, Tailandning "Chonburi Bluveyv" va Livanning "Bank Beyrut" klublari ham bor. OFK rasmiy sayti har bir guruhga alohida to'xtalib, imkoniyatlarni baholadi va albatta "Olmaliq" futzal klubi haqida ham o'z fikrini bildirdi.

Sayt "Olmaliq" haqida shunday yozadi: "Olmaliq" - O'zbekistonning amaldagi chempioni. Tarkibda milliy terma jamoaga nomzod o'yinchilar ko'p. "Olmaliq" futzal bo'yicha klublar o'rtasidagi Osiyo chempionatida ikkinchi bor qatnashyapti. Jamoa o'tgan yil chorak finalgacha etib borgandi. Qizig'i shundaki, "Olmaliq" o'tgan yil chorak finalda aynan "Chonburi Bluveyv"ga mag'lub bo'lib musobaqani tark etgan. Bu safar esa har ikkala klub bir guruhdan joy olgan".

"Olmaliq"ning guruhdagi raqiblari haqida nimalarni bilamiz?

Tailandning "Chonburi Bluveyv" klubi ushbu musobaqada ketma-ket ettinchi bor ishtirok etadi. Bu jamoa Osiyoning eng nomdor futzal klublari qatoriga kiradi. "Chonburi" 2013 yilgi musobaqada birinchi o'rinni egallagan, 2014 yil esa ikkinchi o'rin bilan cheklangan. Jamoa tarkibida Suphavut Tuenklang ismli o'yinchi eng kuchli futzalchi hisoblanadi.

"Livan"ning "Bank Beyrut" futzal klubi esa bu musobaqada uchinchi bor qatnashyapti. Bosh murabbiy - Deyan Dedovich. "Bank Beyrut" 2015 yilgi Osiyo chempionatida chorak finalga qadar borgandi. Bu safar nima bo'lishini vaqt ko'rsatadi.

OFK rasmiy sayti "Olmaliq"qa baho berdi