Бу мусобақада жами 14та жамоа иштирок этади. "А" ва "В" гуруҳларида тўрттадан, "С" ва "D" гуруҳларида эса учтадан жамоа ўрин олган.

Мазкур турнирда Ўзбекистон номидан қатнашадиган "Олмалиқ" футзал клуби "D" гуруҳида кураш олиб боради. Ҳар бир гуруҳдан иккитадан жамоанинг кейинги босқичга чиқишини ҳисобга олсак, "Олмалиқ" жуда яхши имкониятга эга.

"Олмалиқ" жой олган гуруҳда шунингдек, Таиланднинг "Чонбури Блувейв" ва Ливаннинг "Банк Бейрут" клублари ҳам бор. ОФК расмий сайти ҳар бир гуруҳга алоҳида тўхталиб, имкониятларни баҳолади ва албатта "Олмалиқ" футзал клуби ҳақида ҳам ўз фикрини билдирди.

Сайт "Олмалиқ" ҳақида шундай ёзади: "Олмалиқ" - Ўзбекистоннинг амалдаги чемпиони. Таркибда миллий терма жамоага номзод ўйинчилар кўп. "Олмалиқ" футзал бўйича клублар ўртасидаги Осиё чемпионатида иккинчи бор қатнашяпти. Жамоа ўтган йил чорак финалгача етиб борганди. Қизиғи шундаки, "Олмалиқ" ўтган йил чорак финалда айнан "Чонбури Блувейв"га мағлуб бўлиб мусобақани тарк этган. Бу сафар эса ҳар иккала клуб бир гуруҳдан жой олган".

"Олмалиқ"нинг гуруҳдаги рақиблари ҳақида нималарни биламиз?

Таиланднинг "Чонбури Блувейв" клуби ушбу мусобақада кетма-кет еттинчи бор иштирок этади. Бу жамоа Осиёнинг энг номдор футзал клублари қаторига киради. "Чонбури" 2013 йилги мусобақада биринчи ўринни эгаллаган, 2014 йил эса иккинчи ўрин билан чекланган. Жамоа таркибида Супҳавут Туэнкланг исмли ўйинчи энг кучли футзалчи ҳисобланади.

"Ливан"нинг "Банк Бейрут" футзал клуби эса бу мусобақада учинчи бор қатнашяпти. Бош мураббий - Деян Дедович. "Банк Бейрут" 2015 йилги Осиё чемпионатида чорак финалга қадар борганди. Бу сафар нима бўлишини вақт кўрсатади.

ОФК расмий сайти "Олмалиқ"қа баҳо берди